“Schotte ta infundá i no por keda den parlamento”

310
No mas: Schotte no ta miembro di parlamento mas i no tin mas opshon di apelashon.
Punda— E petishon di Gerrit Schotte pa wòrdu re-instalá den Parlamento di Kòrsou, no tin un fundeshi pa para riba dje. Korte di Apelashon den Derechinan Atministrativo a konkluí ku e ordenansa unda ta retirá miembronan di parlamento ta na vigor pa Schotte i no mester di un dekreto pa esaki ta funshonal. Esaki ta nifiká ku e wesnan prosedente di Aruba, Haan, Soffiers i Martinez a konkluí ku e súplika di Schotte no tin un base pa para riba dje.

Esaki ta lokual e veredikto emití pa Korte Komun ayera na medionan di komunikashon ta konkluí. Schotte despues di e risibí un karta di presidente di Parlamento ku e ta retirá for di parlamento a protesta e karta i riba 18 di yanüari último, Korte Sivil (Tribunal Atministrativo) a trata e protesta di Schotte.

Schotte  basa su mes riba e hecho ku e ordenansa pa retirá su miembresia fo’i parlamento no ta aplikabel. Esaki pasobra nunka no tabatin un dekreto nashonal pa inkorporá esaki.  Tabata Rutsel Martha kende a hiba e diskushon tékniko den korte, lokual ta rekerí konosementu profundo pa komprondé. Segun Martha aparte di artíkulo 45 di Areglo di Estado huntu ku e Ordenansa ku ta Reglamentá Retiro komo miembro di Parlamento, mester tin un dekreto emití (publiká). Pasobra e ordenansa den kual, ta eksihí pa spesifiká abase di kua delito e retiro a tuma lugá. I segun Martha, e dekreto aki no tei lokual ta kuestioná alabes balides di e Ordenansa riba su mes, den e kaso spesífiko di Gerrit Schotte. Segun Martha e desishon di retiro pa Schotte, no ta bálido i mester wòrdu re-instalá den Parlamento di Kòrsou.

E base pa aplikashon di e Ordenansa pa retirá miembronan di parlamento ta haña su base den art 45 Areglo di Estado. Den e artíkulo aki tin un sumario apuntá bou di kua kondishon por ehekutá retiro di un parlamentario. Un kastigu di prizon irevokabel ta unu di e puntonan bou di kua por retirá un parlamentario. Pero, segun e artíkulo, e ordenansa alabes ta regla tambe e delitonan bou di kua ta permití pa eliminá e miembresia for di parlamento. Martha ta konkluí ku Areglo di Estado no por wòrdu apliká pa ehekushon di lei sino mester ta kompaña ku spesifikashon di e desishon, referiendo bek na deskripshon di e delito kometé kual a kondusí na un kondena penal,  konforme e ordenansa. Pa pa por apliká e ordenansa esaki mester a drenta na vigor mediante un dekreto. E dekreto pa balides di e ordenansa nunka no a wòrdu emití. Esaki ta nifiká ku e Ordenansa Reglamento Retiro di Parlamentario, nunka no a drenta na vigor pasobra no tin un dekreto emití. Pues,

Soliana Bonapart & Aardenburg a representá gobièrnu. Pa Lei Atministrativo ta wes ta disidí ken ta e entidat pa hiba defensa kontra di un súplika. Wes mr. Haan, di Aruba  a splika gobièrnu ku nan ta presente pa representá Presidente di Parlamento i no gobièrnu. Pasobra ta Presidente di Parlamento ta e entidat kuestioná den e súplika entamá pa Gerrit Schotte. Mr. Tweeboom a splika ku e problema ta bastante simpel. Arti 44 Areglo di Estado ta spesifiká eksaktamente bou di kua kondishon por retirá un miembro di Parlamento. Atribushon di e artíkulo aki outomátikamente ta drenta na vigor asina tin un kondena penal irevokabel. Esei ta nifiká ku abase di e kondena, Schotte no ta miembro mas di Parlamento.  E diskushon riba balides di e Ordensa pa Reglamente Retiro fo’i Parlamento segun Michael Bonapart no ta unu bálido. E eksperto sivil a referí na introdukshon di e leinan di reino den kuadro di kambio di statuto pa e kambionan den struktura estatal di 10-10-10. Segun Bonapart, tur ordenansa inkluso esun pa retiro di miembronan di parlamento, outomátikamente a drenta na vigor i ta aplikabel pa Schotte. Korte a duna Tweeboom i Bonapart rason unda a dekretá ayera ku Schotte no ta fundá den su petishon.