Seis menor di edat asesiná pa brueria na Tanzania

69
E situashon ta unu di alerta i a pidi mayornan ta ku nan yunan tur ora.

TANZANIA – Seis menor di edat di entre tres i seis aña di edat a keda sekuestrá i brutalmente asesiná durante e último luna na Tanzania. Esaki den un kaso nobo di mortonan ligá na brueria.

E responsabel médiko di e region Njombre, na sùitost di e pais, a konfirmá na medionan di komunikashon e hayasgo di seis kurpa sin bida, di kua a saka nan órganonan, inkluyendo e sistema digestivo i reproduktivo.

Segun e dòkter a indiká, e menornan di edat a keda sekuestrá ora nan tabata rumbo skol i nan kurpanan a keda mutilá i posteriormente hañá, provokando temor den e poblashon.

E gobernador di Njombre, Christopher Ole Sendaka, a ordená detenshon di tur e sanadornan bruho i a rekomendá mayornan di e zona pa kompañá nan yunan na tur momentu pa di e forma aki por garantisá nan seguridat.

Den un komunikado, e kordinadó di ONU na Tanzania, a kondená e aktonan aki i a ofresé e pais apoyo pa asina bringa i solushoná e problema aki.

Na Tanzania, e kreensia i práktika di brueria ta biba i ta basta komun e asesinatonan ku ta vinkulá ku e práktika aki. Brueria tin su presensia tantu den zonanan rural komo siudatnan i komunidatnan.

E mayoria di e asesinatonan ta hendenan muhé, ansianonan i menornan di edat i e region di mas afektá ta e zonanan rural na sùit di e Lago Victoria.