Dos morto i kuater herido den eksploshon reportá na Filipina

26
Sitio unda e eksploshonnan a keda registrá.

MANILA – Un total di dos persona a pèrdè nan bida i otro tres a resultá heridá den un eksploshon den oranan di mardugá na sùit di Filipina. Esaki tres dia despues ku un atentado a keda atribuí na e grupo yihadista Abu Sayyaff, a mata un total di 20 persona den e zona.

Dos hòmber ainda sin por a keda identifiká, a manda granada poko despues di mei anochi na Sitio Logoy Diutay, di e siudat di Zamboanga, ubiká na e region mayormente musulman na sùit di Filipina.

E víktimanan, lidernan religioso di otro provinsia serkano ku tabata di bishita, tabata drumí na momentu ku e eksploshon a keda registrá.

Outoridatnan ta investigando e posibel motibu di atake, kua lo por tabata trata aki di un vengansa personal entre gruponan musulman. Esaki aunke ku ta deskartá ku tabata relashoná ku e atentado di djadumingu último na Sulu.

Dos bòm a eksplotá ku un minüt i mei di diferensia den i pafó di e katedral di Joló, kapital di e provinsia di Sulu, un di esnan mas mortifero di e último añanan.

Outoridatnan filipino a indiká ku nan ta totalmente sigur ku tabata trata aki di milisia Ajang-Ajang, frakshon di Sulu di Abu Sayyaf, aunke ainda no por a verifiká outornan material di atake.

Outoridatnan filipino den oranan djamars último a asesiná Adman Asilon, miembro di Abu Sayyaf, durante un tiroteo na Zamboanga. Awor ta investigando e posibel vinkulashon ku esnan responsabel di e atentado na Sulu.

Apesar di a alkansá na aña 2014 último, un akuerdo di pas ku e grupo rebelde musulman di mas grandi di e pais, na e parti sùit di Filipina ainda ta eksistí milisianan yihadista radikal, leal na Estado Islámiko, kendenan ta kapas di kometé atentadonan serio. Esaki ademas i pa e mesun motibu aki, ta mayor menasa pa seguridat den e zona.