Hòmber ku a hui bai skonde na Sto Domingo arestá

Man nan largu di hustisia  bai te aya

2273
Yegada di e avion for di Repúblika Dominikana ku e sospechoso abordo.
Willemstad—  Despues di un búskeda di mas ku 2  aña outoridatnan a logra di detené un hòmber ku tabata ser buska pa ta envolví den un organisashon di droga.

Henter e investigashon a kuminsá dia 14 di sèptèmber 2016 ora ku outoridatnan den oranan di mardugá a tuma nota di un karavana di vehíkulo moviendo na altura di Biesheuvel den direkshon di Rio Canario ku velosidat haltu. Mesora a kuminsá ku un persekushon  i tabata na altura di e warda di Polis na Rio Canario a logra di blòkia un di e vehíkulonan miéntras e pikòp si a logra di kore bai. A sigui ku un persekushon tras di e pikòp ku a kue direkshon di bai Boka Samí.

Dado momento na altura di Bullenbaai a bin pèrdè e pikòp pa mas despues a bin haña esaki hinka den un pida mondi sin niun okupante. A konfiská e vehíkulo bai warda kuné pa mas investigashon. miéntras den e SUV ku si a logra para na Rio Canario a bin topa ku dos menor di edat ku tabata den poseshon di arma di kandela. Ora a bai wak den e vehíkulo mes a bin topa ku diferente bulto. Na Momento ku a habri e bultonan a bin topa ku kantidat di droga ku tabata konsistí di arma di kandela i tambe kokaina i mariwana. E dos hóbennan a keda detené pa mas investigashon. For di investigashon a bin saka afó ku e grupo aki mester a kaba di tuma un kargamentu di droga ku a drenta Kòrsou via di Sint Joris Baai  i tabata transportando esaki pa un otro sitio.

For di investigashon ku outoridatnan a realisá a bin saka afó ku e sospechoso ku tabata manehá e pikòp ku a logra di kore bai mester sa frekuentá un kas den e bario di Jan Kok. Den luna di novèmber di e mesun aña ei  a tene entrada nan hudisial den kas na Jan Kok i tambe den Juan Hatoweg. E dia ei a konfiská algun vehíkulo i tambe sèn. Pero mas despues mester a entrega mayoria vehíkulo ku a ser konfiská bek. Entretantu mirando e edat di e  hóbennan ku a keda arestá den e kaso aki a bin rekobrá nan libertat ku kondishon mara na dje miéntras ketu bai tabata buska e supuesto sospechoso mayó.  Via di Interpol a bin saka afó ku e sospechoso aki mester a hui bai e pais Sta Domingo. Outoridatnan lokal a logra di tuma kontakto ku esnan na Repúblika Dominikana pa sa paradero d e sospechoso. Esaki no tabata masha difísil unda a topa ku e sospechoso i asina a sake for di Sta Domingo pone riba un avion rumbo pa Kòrsou. Na  Sto Domingo no a detené e sospechoso pero si a sake for di e pais. Tabata na momento ku e la drenta teritorio di Kòrsou pa ta mas eksakto ora ku e la yega na airport ku e avion a baha e la keda detené komo organisadó di un transporte di droga. Mesora aki e la keda presentá dilanti un Fiskal kua  ordená su enkarselashon pendiente mas investigashon.