Kuater periodista detené den palasio presidensial di Venezuela

39
Dos di esnan ku a keda detené.

CARACAS – Kuater periodista, entre nan dos chileno, a keda detené den palasio presidensial di Miraflores, na Caracas, segun a keda informá pa e Sindikato Nashonal di Trahadónan di Prensa di Venezuela.

E komunikadónan Maiker Yriarte i Ana Rodriguez, ambos venezolano, a keda poné den libertat den oranan di ayera mainta, despues di pasa dies ora detené den e sede di Poder Ehekutivo. Esaki segun loke a keda spliká pa e sekretario general di Sindikato, Marco Ruiz den un deklarashon na medionan di komunikashon.

Esaki a sigui indiká ku ámbos ta bon di salú pero ku nan a keda eksponé na agreshonnan verbal i nan a keda obligá di firma un akta ku ta papia di un trato i ku ta afirmá ku a garantisá nan derechinan, manera komunikashon, miéntras ku esaki no tabata e kaso.

Miéntras tantu, e periodistanan chileno Rodrigo Pérez i Gonzalo Barahona ta kontinuá ainda detené den e palasio.

Na e sitio tin esun enkargá di e embahada di Chile na Venezuela, Roberto Araos, kende ta den espera di e liberashon di e reporteronan.

E kuater komunikadónan a keda detené na momentu ku nan tabata duna kobertura na un vigilia ku tabata keda realisá na e sitio i ku a keda konvoká pa e gobernante di e Partido Sosialista uní, den serkania di e palasio presidensial.

E presidente chileno, Sebastian Pinera, a skibi riba su kuenta di Twitter, ku nan ta eksigí liberashon inmediato di su periodistanan na Venezuela. El a sigui indiká ku nan ta realisando tur e gestion nan nesesario. Mas aleu esaki nan a indiká, ku libertat di prensa ta otro víktima na Venezuela.

E kanalnan, emisoranan i korantnan di Venezuela, tantu privá komo públiko, a stòp di transmití protestanan di e Kámara i deklarashonnan di e kabesante di Parlamento, Juan Guaidó, kende dia 23 di yanüari último a anunsiá ku e ta asumí e kompetensianan ehekutivo komo presidente enkargá.