OM ta haña un mion mensahe mas di kriminalnan

72
mensahenan nobo pa solushoná likidashonnan
AMSTERDAM—Mas investigashon di dos server ku mensahenan seyá di telefònnan blackberry (PGP), a produsí kantidat grandi di informashonnan nobo pa OM.

Ta trata entre otro di mas di un mion mensahe di kriminalnan ku por usa den gran kantidat di kasonan penal. PGP ta para pa Pretty Good Privacy, asina yama telefonnan kripto ku por manda via di e Sistema aki mensahenan seyá. Prinsipalmente den sirkulonan kriminal e aparatonan ta popular pasobra ni OM ni polis no por kibra e seyo. Pero a logra drenta den dos server ku a haña den 2016 na Canada i Costa Rica. Un team spesial di reshèrshi, Team High Tech Crime a sigui buska den e sistemanan i a haña mas ku 1 mion mensahe nobo. E mensahenan tin informashon di likidashonnan, investigashonnan grandi di droga i ekstorshon. Mensahenan fuerte. Algun di e mensahenan a keda usa den kasonan den korte kaba. Den un kaso di likidashon a usa e siguiente mensahe: “si boso mat’e di dia kla, boso lo keda bon rekompensá’. E tipo di mensahenan aki ta util pa OM. Di e manera aki ta haña hefenan ku di otro manera lo no a bini dilanti segun OM. Tambe a logra detené sospechosonan di likidashonnan riba hende robes ku e material di prueba aki. E mensahenan nobo por kondusí na solushon di kasonan mas bieu.