Willemstad—Den oranan tempran di djaweps 31 di yanüari 2019 Kuerpo Polisial (KPC) huntu ku Ministerio Públiko (OM) i Koninklijke Marechaussee (KMar) a tene un kontròl di alkohòl na altura di Sunscape Hotel. Atrobe a hasi uso di un aparato pa analisá rosea. (adem-analyse apparaat).

Durante e control, dos sospechoso a supla respektivamente 535 i 415 mikrogram di alkohòl pa rosea suplá (UGL).Esaki ta mas ku e kantidat ku ta permití legalmente ku ta 220 UGL. Bebiendo dos serbes ya por yega na e kantidat aki. E dos sospechosonan a haña un dagfar pa presentá den korte dia 11 di febrüari 2019 parti mèrdia. Si nan keda kondena, nan ta haña un karchi penal ku e echo kastigabel di alkohòl. Segun lei esaki ta un delito. E karchi penal di Kòrsou, tambe ta visibel mesora na Hulanda. KPC i OM kier baha e kantidat di aksidente di tráfiko ku resultadonan fatal (den 2018 tabata 18).Mayoria tabata relashoná ku alkohòl. Pa e motibu aki lo bai tene kontròl nan riba alkohòl riba un base mas frekuente. Di e manera aki mester baha e kantidat di aksidente ku herido i daño material di mas ku 13.000 aksidente di tráfiko pa aña.