Willemstad— Tabata e tim di aresto ku a drenta kamber di un Hotèl riba Rooseveltweg pa asina por a logra di detené un hòmber kual ta wòrdu sospecha di ta envolví den e kaso di asesinato riba e tereno di Baya.

Kontinuando ku investigashon relashoná ku e kaso di asesinato ku a tuma lugá den área di Baya Beach riba djamars 29 di yanüari último, djaweps 31 di yanüari 2019, alrededor di 00.22or, a detené e hòmber G.M.A.M., nasé na Kòrsou di 52 aña di edat, komo sospechoso den e kaso aki.

Riba òrdu di Ministerio Públiko, reshèrshinan huntu ku Tim di Aresto a detené e hòmber aki na un hotèl riba F.D. Rooseveltweg.

Alabes a konfiská vehíkulo di e sospechoso pa mas investigashon.

A presentá e sospechoso dilanti un Fiskal Ouksiliar ku a ordená su enkarselamentu pendiente di mas investigashon. Tambe Polis a emití un komunikado unda a bin logra di identifiká e víktima ku a keda asesiná riba e tereno na Baya Beach.  E víktima maskulino ku  a keda identifiká komo:

  • Alwin Eliphlet Bremer, nasé na Kòrsou, 9 di mei 1957. Investigashon den e kaso aki ta kontinua.