A rementá bankomátiko na Tera Kòrá kousa basta destrukshon na Botika

No a logra di bai ku niun plaka

219
E sentro komersial na Tera Kòrá unda a bai pa rementá e bankomátiko.
Willemstad— Un biaha mas  kier a bai ku plaka for di bankomátiko hasiendo e mesun sistema dor di yena e bankomátiko ku gas i eksplotá esaki pa asina por yega na e parti unda e sènnan ta warda.
E silinder di gas huntu ku e slan ku a ser usa.

Ayera den oranan di mardugá via di e kámaranan den e aria di e sentro komersial na Tera Kòrá por a tuma nota kon dos tipo ku kara tapa i nan kurpa tambe kompletamente kubri a yega na e bankomátiko na Tera Kòrá. Ta trata di e mashin di plaka ku ta pertenesé na Banko di Caribe.

A hinka e slan den e mashin di plaka pa asina por a yena gas den e kompartimentu.

E tiponan aki a logra di spùit e kámaranan pa despues bres e parti unda ta saka sèn pa asina por a hinka un slan den esaki. E slan tabata konektá ku un silinder di gas ku a ser pone den banda di e edifisio. A yena e bankomátiko ku gas i hasiendo uso di un waya a eksplotá esaki. E eksploshon tabata di tal magnitut ku esaki kasi a destruí e bankomátiko por kompletu pone ku esnan ku a bin pa hòrta no por a yega mes na e parti unda e sènnan tabata warda. E eksploshon tabata asina fuerte ku esaki a kousa basta destrukshon na e botika tambe ku ta pega ku e bankomátiko.

Debí na e eksploshon asta porta di heru a Sali for di kozein bai kai.

Esaki a pone ku portanan a Sali bai kai na un distansha i murayanan a sker. Polisnan mesora a kuminsá ku nan investigashon unda a konfiská e silinder di gas i tambe e slan pa mas investigashon. Mester a sera e aria pa asina por a hasi mas investigashon. Esaki ta e di tres bankomátiko ku ta wòrdu eksplotá miéntras na dos okashon a intentá pero no a logra di rementá esakinan.

Ministerio Públiko ta bai pidi kastigu severo pa esnan ku ta eksplotá ATM

Willemstad—–Tin un plaga na Kòrsou di gèngnan ku ta eksplotá kahero nan outomátiko (plofkraak). Ta parse ku e gèngnan aki no ta para ketu na kiko ta e kastigu ku nan por risibí serka wes.

Aki no ta solamente e echo ku ta kibra i hòrtá huntu, pero nan lo wòrdu kulpá tambe di a okashoná EXSPLOSHON ku peliger pa hende i material. Na Hulanda ya kaba bo por haña un kastigu di prizon di 4 aña. Kastigunan na Kòrsou lo no desviá mashá for di esaki.

Esaki no ta tur kos. Si bo wòrdu gará, lo bo mester paga e kantidat di plaka hòrtá bèk, i tambe gastunan di daño na por ehèmpel edifisio i interiornan. Akinan lo apliká pena supsidiario. Fásilmente esaki por bira un kastigu di prison di tres aña èkstra.

Pensa bon, shete aña SDKK!!