Barku di marina ta interseptá 2000 kilo di droga

735
E barku di marina Zr.Ms. Zeeland a interseptá un transporte di 2000 kilo di droga den e marduga di 28 pa 29 di yanüari. E interseptashon a sosode durante di un patruya den e laman Karibe. E sospechosonan i e paketenan ku droga a ser entrega na Warda Kosta di Merka.

Un avion di Warda Kosta di Karibe Hulandes a detektá e kontakto sospechoso djaluna último riba laman ganchu. E boto su aktuashon i posishon tabata unu notabel i a hala atenshon. E helikòpter NH90, e FRISC, e boto pa interseptashon ku na bordo un tim di Warda Kosta Merikano a logra para e boto sospechoso.

Konfiansa
E Komandante di Zr.Ms. Zeeland, kapitan-lùitentant naval Paul Bijleveld, ta satisfecho ku e kantidat grandi di droga ku a interseptá. Tambe e ta orguyoso kon e trabou a ser ehekutá konhuntamente ku e diferente organisashonnan. “Un akshon ku un resultado positivo. Dor di e kolaborashon konhunto i bon trabou di tim di Warda Kosta, e helikòpter NH90, e tim di Warda Kosta Merikano i e tripulashon di Zr.Ms. Zeeland e  interseptashon tabata unu eksitoso.”

Barku di Marina Real
Zr.Ms. Zeeland ta un “Oceangoing Patrol Vessel” di Marina Real. For di dezèmber e barku ta stashoná komo barku di marina den Karibe. Durante e periodo ku e ta stashoná den Karibe e la detené un go-fast sospechoso ku un gran kantidat di sèn na bordo. Tambe e la logra stroba un transporte di droga, na momento ku un boto sospechoso a tira paketenan ku supuestamente droga for di bordo.