Bríndis di aña di Stichting Thuiszorg Banda ‘Bou

154
Direktora: Phaedra Elings, direktora general di e fundashonan, a rekapitulá kiko a tuma lugá aña pasá i el a pone énfasis riba plannan pa 2019.
Banda Bou-– Stichting Thuiszorg Banda ‘Bou a organisá siman pasá un bríndis di aña pa su trahadónan i boluntarionan den kuido na kas, e kas di kuido Grandi na Kuido i e sentro di aktividat “Zr. Astrid Gregorio”. Phaedra Elings, direktora general di e fundashonan, a rekapitulá kiko a tuma lugá aña pasá i el a pone énfasis riba plannan pa 2019. E sektor di kuido ta den transishon i e fundashon mester adaptá na e kambionan aki.
Organisá: Stichting Thuiszorg Banda ‘Bou a organisá siman pasá un bríndis di aña pa su trahadónan i boluntarionan den kuido na kas.

Señora Elings a enfatisá e nesesidat pa traha huntu ku Betèsda, Stichting Birgen di Rosario i Stichting Wit Gele Kruis pa kuido na kas  “Prinses Margriet” pa baha gastu i oumentá efisiensia. Stichting Thuiszorg Banda ‘Bou ta preparando pa hospital nobo tambe. Den  kuadro di esaki e fundashon lo invertí den treinen i ‘coaching’ di su enfermeronan i hefenan di departamento pa asina nan por ofresé kuido na kas na pashéntnan ku a sali hospital ku un komplikashon klíniko. E aña aki Stichting Thuiszorg Banda ‘Bou no ta papia di problemanan sino retonan ku e ta atendé na un manera inovativo. Pa oumentá produktividat i efisiensia di kuido na kas, e kas di kuido i e sentro di aktividat, Stichting Thuiszorg Banda ‘Bou ta trahando riba standardisashon di prosesonan. Aktualmente e fundashon ta mehorando prosesonan di kalidat pa e por optené e sertifikashon di ISO den novèmber 2019.

E direktora di e fundashon nan tambe a ekspresá su deseo pa forma un famia ku tin mesun meta. E famia mester konsistí di e trahadónan den kuido na kas, Grandi na Kuido i sentro di aktividat “Zr. Astrid Gregorio”. Personal di tur fasilidatnan ta wòrdu stimulá pa nan ta mas envolví den aktividatnan i pa nan tuma mas responsabilidat den e organisashon.