Momento ku Jan de Vin i Middelhof a bandoná reunion ku Minister Girigorie.
Punda— Minister di hustisia Quincy Girigorie ayera tabatin “hoog bezoek”. Komandante di Marina Real, Jan de Vin i direktor di Warda Kosta na Kòrsou, Eugene Middelhof tabata den Punda. E bishita a tuma lugá den oranan di mainta.

Minister Girigorie a konfirmá e reunion splikando Vigilante ku ta trata di un reunion den kuadro di algun puntonan di mehorashon na Warda Kosta. Segun e minister ta trata di kontinuashon di un reunion ku a inisiá na desèmber. E minister no a kontesta si e tópiko di Venezuela tabata riba nan punto di agènda. Entretantu yegada di algun vehíkulo Anaconda, a lanta hopi spekulashon na Kòrsou e siman aki alegando ku ta vehíkulo importá debí na e situashon tenso na Venezuela. En realidat esei no tabata e kaso sino ta trata un kompra pa remplasá vehíkulonan Benz ku tabata den operashon. Djaweps 31 di yanüari, e promé Anaconda a yega Kòrsou. E 4×4 IVECO Anaconda lo remplasá e vehíkulonan aktual di Defensa den Karibe. E vehíkulonan aktual di tipo Mercedes Benz 280 lo regresá Hulanda i lo ser usá pa Ehérsito Hulandes. Tur e Anacondanan nobo a yega Kòrsou e siman aki i lo tin mas na kaminda den transkurso di otro siman. For di Kòrsou lo entregá e Anacondanan pa Aruba i Sint Maarten. Entretantu, ehérsito i marina real a hiba ehersisionan na Aruba. Segun Marina Real ta trata di ehersisionan regular.