Punda– Korte sivil mediante wes mr Veling no tabatin niun kompashon pa lokual Parman Internashonal i Ennia Caribe Holding a suplika pa kanselá e medida di emergensha imponé na yüli di aña pasá.

Esaki ta lokual e veredikto di e wes a konfirmá despues ku Parman Internashonal a trata  na supliká korte sivil na Kòrsou pa eliminá e medida imponé pa Banko Sentral. Korte kombinsentemente a rechasá tur supliká di Ennia i Parman. Esaki ta nifiká ku Banko Sentral di Kòrsou tin tur derechi pa sigui mantené Ennia Caribe bou di supervishon.

Balor di Mullet Bay Resort ta un diskushon importante pa determiná si e grupo di Ennia Caribe Holding via di EC Investment i Ennia Caribe Leven, tabatin outorisashon pa invertí for di e bolsa di aseguradonan di Ennia. Den e wisio sumario entamá pa Parman International, Banko Sentral e kuestioná si e balor riba balans na Ennia Caribe Leven ta unu representativo.

Hinter e diskushon di sakeo di aktivo na Ennia ta regardá Mullet Bay. Mulett Bay ta balorá aktualmente segun Parman International na 770 mion florin. Segun Banko Sentral, e balor di Mullet Bay no ta surpasá 90 mion florin. Hasta segun abogado mr. Karina Keizer, di e bufete Ox & Wolf, dependé ki formulashon di balor apliká, e balor di Mullet Bay por yega hasta sero. Un diskrepansha enorme entre e dos partidonan ayera den korte di hustisia.
E balor ta importante, pasobra esaki ta anotá komo aktivo serka EC Investment, kende a uza entre otro e balor aktivá di Mullet Bay pa por responsabilisá invershon via di Ennia Caribe Leven pa bolsa internashonal di balor. Pues 770 mion florin a sirbi ku un tipo di “collateral” pa EC Investment por a uza sèn di Ennia Caribe manda pa Parman International B.V. por a uza riba bolsa di balor estado unidense. 770 mion kita 90 mion ta un diferensha grandi di 680 mion florin.
Segun Parman International den korte, nan ta asombrá ku awor Banko Sentral ta kuestioná e balor di Mullet Bay miéntras pa años esaki a wòrdu aseptá. Banko Sentral entretantu a laga balorá e tereno via di un kompania Cushman & Wakefield, kende no a duna mas ku 90 mion florin na Mullet Bay. Abogado Karina Keizer di e bufete Ox  & Wolf kende a representá Banko Sentral a haña rason finalmente den korte pa konkluí ku balor di Mullet Bay no tin base di balorashon kompará lokual Parman a saka foi Ennia.