Minister Hensley Koeiman ta bisa ku a konstatá ku tabatin hende ta bira malu i ku tin schimmel ku ta hasi sierto hende malu.
Willemstad,– Minister Hensley Koeiman ta splika ku e asuntu di schimmel i CO2 den e edifisio di SOAW na Punda ta den investigashon.  E ta bisa ku ADC a pone aparatonan pa midi schimmel. Segun minister Koeiman ku ta for di promé ku el a bira minister tabatin schimmel i ora ku el a bira minister el a aserka tur instansia pa atendé  e problema. E ta bisa ku aworakí el a bai poko mas largu, paso kier a pone mas kapasidat pa CO2 i mas kapasidat pa èrko. Minister ke pa e edifisio ta un ehèmpel pa sobra edifisionan i ta bai usa e trayekto aki komo un draaiboek pa den futuro ora ku ta muda òf konstruí un edifisio di gobièrnu.

Minister ta bisa ku a konstatá ku tabatin hende ta bira malu i ku tin schimmel ku ta hasi sierto hende malu. Tambe e ta bisa ku ta bai buska un hende/instansia  pa atendé ku e parti di duna guia na e trahadónan. “Minister no tei pa atendé ku èrko ets, bo mester tin un instansia pa hasi esaki”, asina Koeiman a duna di konosé. Pues e ta bisa ku e ta spera ku pronto lo yega na akuerdo paso pueblo meresé e servisionan ku nan ta duna. “Tur hende ta konsiente ku tin un retraso ku tin konsekuensha pa nos ekonomia i mester atendé ku esaki”, asina e minister di SOA a duna di konosé.