12 detenshon pa kontrabanda droga di Hulanda pa Alemania

179
segun FIOD, organisashon kriminal tabata transportá entre 5 pa 10 kilo di droga pa dia
ALMELO—Den un investigashon internashonal riba kontrabanda di droga i labamentu di plaka a detené 12 persona den Hulanda i Alemania.

E investigashon ta indiká ku tin un organisashon kriminal aktivo den trafikashon di droga na frontera ku Alemania na Almelo. E sospecho ta ku tur dia ta transportá entre 5 pa 10 kilo di droga di Hulanda pa Alemania. Ta kumpra e droga probablemente via darkweb i paga esaki ku bitcoins òf otro medionan segun servisio di investigashon fiskal FIOD. E servisio a traha den koperashon ku outoridatnan, polis, Defensa i duana aleman. Parket ta guia e investigashon. E sospechosonan prinsipal ku a detené na Alemania ta dos ruman hulandes di 31 i 27 aña ku ta biba na Enschede i Alemania. Nan tabata hasi uso di personanan ku ta paketá e droga na Hulanda i hiba e paketenan pa Alemania, segun FIOD. Na Alemania a detené tres otro persona. 6 hòmber i un dama a keda detené na Hulanda, prosedente di Breda, Enschede i Almelo. Durante e akshon a tene entradanan den diferente kas i negoshi den tur dos pais i konfiská atministrashon, droga i material pa paketá.