7 aña kastigu pa kontrabanda di 5000 kilo kokaina

57
7 aña lastigu pa sospechoso prinsipal kontrabanda struktural for di Costa Rica
AMSTERDAM—Ronnie W (49), sospechoso prinsipal den kontrabanda di 5000 kilo di kokaina via haf di Antwerpen, a keda kondená na 7 aña kastigu den korte di Amsterdam.

Segun korte W tabata e mente den e proseso logistiko kaminda e kokaina a keda transportá den un karga di anasa for di Costa Rica pa Oropa den mart 2016. W ku no tabata presente den korte, mester keda enkarselá mésora, sigur pasobra tin peliger di ripitishon segun korte. E sospechoso ainda ta traha den un kompania ku ta importá konteiners. OM a pidi 10 aña kastigu pa Ronnie W. W a haña kondena di 8 aña pero a haña redukshon di 10% kastigu pasobra a graba kombersashonnan entre su persona kus u abogado na warda di polis. Algu ilegal segun korte pero pasobra e grabashon no tabata kontene prueba no a honra e petishon di e abogado pa deklará OM inatmisibel. Dick de L, a tende 5,5 aña kastigu, ku 5% redukshon pa motibu di su detenshon preventivo. De L a pone su kompania disponibel komo kapa pa importashon di kokaina. E kompania a importá un total di 97 konteiner ku anasa. E anasa tabata keda kumpra kèsh na Costa Rica, total 1,2 mion euro. Pa e motibu aki a kondena L pa labamentu di plaka tambe. Ismael O tabata e shofur ku a transportá e karga di anasa pa un lots den Brabant. Loke e banda di trafikantenan no tabata sa ta ku duana a konfiská mayoria di e droga, i sigui e transporte pa Hulanda. Ta akusá O di a purba skonde su ròl despues ku a interseptá e transporte. Korte ta konsiderá e mensahenan seyá komo prueba. O tambe a haña redukshon di kastigu pa motibu ku a graba su kombersashonnan ku su abogado na warda polis. El a haña kastigu di 3 aña, OM a pidi 6. E dos otro sospechosonan Ted H i Adil A a haña kastigunan di respektivamente 27 ku 15 luna. Tur sospechoso, ku eksepshon di Ronnie W, por warda eventual apelashon den libertat.