Asesino den pasado ya a yega di asesiná dos hende na Hulanda 

Víktima tambe tabata envolví den un kaso di asesinato aki na Kòrsou

8806
Willemstad— Ayera e sospechoso ku a keda arestá pa e kaso di asesinato riba e tereno na Baya a keda presentá dilanti wes komisario unda su detenshon a keda alarga.

 

Tabata den oranan di mainta trempan e tim di aresto bou di un vigilansha speshal a trese e sospechoso di 52 aña  den Punda pa asina e por keda presentá dilanti wes komisario. A bin kuné di bui na tantu man i pia i tambe ku su kara tapa kual ta e manera ku tim di aresto ta hasi nan transporte di sospechosonan. E hòmber aki di inisial G.M.A.M. nase na Kòrsou di 52 aña a keda detené den un hotèl riba Rooseveltweg.  Tabata  djamars 29 di yanüari último ora ku e tim di aresto a drenta den e kamber unda e sospechoso tabata hospedando pa asina por a realisá su detenshon. Durante investigashon na e hotèl a konfiská e vehíkulo ku e sospechoso tabata manehá. For di dia e suseso esta e dia ku a bin haña e kurpa sin bida tabatin testigunan ku nan a mira un vehíkulo kolo shinishi di e marka Kia Rio ku un hòmber den dje ku tabata kore rònt riba e tereno di Baya di un forma sospechoso. E shofùr den e vehíkulo tabata manera buska un persona riba e tereno di Baya.

Den e buraku aki a bin topa ku e kurpa sin bida di e víktima Bremer.

Outoridatnan ku a bai na e sitio pa asina por a hasi mas investigashon a bin tuma nota di markanan di sanger riba un trayektoria basta largu. Esaki ta duna e indikashon ku e  víktima ku a bin pèrdè su bida a kana un distansha basta largu ora e tabata sangrando pa despues bai resultá den e buraku bou di e brùg. Tin un sospecho ku na momento ku e sospechoso esta e asesino a tuma nota ku e víktima no tabata duna señal di bida mas e lo mester a drenta den su vehíkulo i a ranka bai ku esaki lagando markanan di tayer atras. Ayera por a mira ku na e palu di pia di  e sospechoso tabatin markanan di herida resien ku por ta duna e indikashon ku tabatin un forsageo entre di e víktima i tambe e sospechoso.  For di investigashon realisá Vigilante a bin saka afó ku e sospechoso di 52 aña  ku a keda detené den pasado ya a hañ’é envolví den dos kaso di asesinato. Un di e víktima a bin pèrdè su bida ora e la wòrdu hinka mata i e otro a ser asesiná dor di hasi uso di arma di kandela. loke ku ta hala atenshon tambe ta ku e víktima ku tin mas di 60 aña tambe a yega di hañ’é envolví den un kaso di asesinato. Tin ku sigui bisa ku e kaminda ku a bin haña e víktima den e buraku  ainda e tabatin  su telefon den un man miéntras den e otro man e tabatin partinan di su parti íntimo. Pa outoridatnan tabata fásil pa asina desifrá kua tabata e último yamada ku e víktima tabatin i ku ken kual a yuda sigur den e investigashon te pa haña sa unda e sospechoso tabata kedando. Ayera e sospechoso a keda presentá dilanti un wes komisario unda su detenshon a keda alarga ku ocho dia mas pendiente mas investigashon.