Curtley Obispo Pagamentu di impuesto na tempu ta na bienestar i progreso di Kòrsou

166

Willemstad,– Segun parlamentario Curtley Obispo, ta ku e kontribushon finansiero di kada kontribuyente (siudadanonan i empresanan) a base di nos leinan di Kòrsou ta paga e gastunan kolektivo presupuestá na bienestar i progreso di Kòrsou. Ta p’esei e kontribushon na tempu di kada kontribuyente ta super importante pa asina kada aña tin un balansa positivo entre entradanan i gastunan kolektivo presupuestá di Pais Kòrsou E parlamentario ta splika ku e presupuesto di kuenta koriente di Pais Kòrsou pa e aña koriente mester ta balansá. Balansá ta nifiká ku huntu tur kontribuyentenan ta duna na tempu nan kontribushon finansiero di belasting segun nos leinan fiskal di Kòrsou i tambe e kontribushon finansiero segun leinan di Kòrsou pa ku servisionan duna dor di e aparato gubernamental di Pais Kòrsou.

E kontribushon finansiero na tempu di kada kontribuyente ta super importante i ta bira entradanan di Pais Kòrsou, pues e kontribushon kolektivo. Pa asina Pais Kòrsou por paga gastunan kolektivo presupuestá.

Parlamentario Curtley Obispo ta sigui aksentuá i sigui mustra riba e balansa finansiero di nos lei máksimo, kual ta un di e normanan finansiero di nos Pais Kòrsou. Ta p’esei tur kontribuyente su kontribushon finansiero na tempu ta super importante pa huntu mantené e balansa positivo entre entradanan i gastunan presupuestá di kuenta koriente di Pais Kòrsou. Un kontribushon, no na tempu di òf no kontribuí ku nada na kaha di Pais Kòrsou dor di kontribuyentenan, ta trese e gastunan kolektivo presupuestá di Pais Kòrsou na peliger i tambe por obligá di ahustá den e gastunan kolektivo presupuestá pasombra e presupuesto di e kuenta koriente di Pais Kòrsou no tin mag di ta negativo pa e aña koriente i añanan ku ta sigui. Ta loke nos komunidat, kada kontribuyente aportá kune finansieramente na kaha di Pais Kòrsou, ta bai bèk i ta disponibel komo e kontribushon kolektivo pa paga for di kaha di Pais Kòrsou e gastunan kolektivo presupuestá.