Despues di Festival di Tumba Wild Cats lo nombra mènedjer nobo

91
Remick Bernadina kende ta kandidato sigur pa mènedjer di Wild Cats, ta un persona ku for di tempu el a subi “AA” te awe, a keda ku e ekipo di Wild Cats, Remick tin sigui mas ku 35 aña ku e ekipo Wild Cats.
Willemstad,– Vigilante a hiba kombersashon ku dirigentenan di e ekipo Wild Cats KJ 74 kendenan a splika Vigilante ku despues ku festival di Tumba pasa, nan lo anunsiá e mènedjer nobo pa temporada 2019.

Pa nada e dirigentenan no kier a slèk ken lo por ta e posibel mènedjer nobo, pero Vigilante ta beisbòl i beisbòl ta Vigilante i nos a bin komprondé ku tin por lo ménos tres nòmber den tapara pa bira mènedjer di e ekipo i ku hasta nan lo por nombra un team di maneho pa temporada 2019.

Un di e nòmber ferviente ku Vigilante a bin haña, ta esun di Remick Bernadina kende ta un persona ku for di tempu el a subi “AA” te awe, a keda ku e ekipo di Wild Cats, Remick tin sigur mas ku 35 aña ku e ekipo Wild Cats. Un problema ku e dirigentenan di Wild Cats ta sintá kune ta ku Bernadina ta traha un trabou ku no ta pèrmití pa e ta tur dia òf tur momentu ku e ekipo, e lo por pèrdè diferente wega debí na su trabou.

Esaki ta trese kuné ku e ekipo ta pensa den direkshon tambe di Ardley Jansen pa fungi komo mènedjer. Archi ta ruman di Kenley kende un i tur sa ku ta yuda Wild Cats ku e parti finansiero i material.

Tambe nan tin bista riba Yurdendell de Caster pa tuma e puesto di mènedjer. Yurendell sigur tin eksperensia de sobra ku ta pone ku e por manehá sigur den nos beisbòl.

Echo ta ku tur e trese kandidatonan aki, esta Remick, Archi i Yurendell tur ta kapasitá pa dirigí e ekipo di Wild Cats, pero echo ta tambe ku dos di e tres nan aki ta hungadónan klave di e ekipo i den e kaso ei, lo mester bai fungi komo mènedjer/ hungadó, siendo ku den kaso di Remick e lo ta mas fásil, pero su tempu pa e ekipo lo ta ménos ku e dos otronan.

E situashon aki lo por hinka e dirigentenan di Wild Cats den e situashon kaminda nan lo por forma un tim di maneho enkabesá pa Remick Bernadina, kaminda na momentu ku e no por ta presente, e dos otronan ta tuma e enkargo over.

Pues ban mira kiko ta e desishon final di Wild Cats pa otro siman, kaminda ku tur probalidat un di e tres personanan aki lo por asumí e puesto di mènedjer pa temporada 2019.