Dominikana den alerta despues di registrá 17 temblor den e último oranan

58
Entre djaweps i ayera den dia

SANTO DOMINGO – E Instituto di Temblornan di e universidat Outónomo di Santo Domingo ta vigilando den oranan di djabièrnè, e aktividatnan di temblor di e pais. Esaki debí na ku e último oranan a produsí 17 temblor di entre 2.6 i 3.7 grado di magnitut. Esaki prinsipalmente na e region na nortost.

Segun a keda indiká, e último di e temblornan aki a keda registrá 8 minüt pasá di 7or i tabatin un magnitut di 2.9 grado, ku un profundidat di 736 kilometer i episentro na 10.8 kilometer di e munisipio di Cevico, provinsia Sanchez Ramirez.

E promé di e eventonan aki, di magnitut 3.0 riba skala di richter, a tuma lugá den oranan di djaweps último na 12.37 ku un profundidat di 107.9 kilometer i su episentro a keda lokalisá na 9.3 kilometer di e munisipio di Maimón.

Entre unu i otro tabatin un total di otro 15 temblor mas, dos di kua tabata di 3.7 grado di magnitut.

Debí na e situashon, a splika ku ta reforsando vigilansia di e aktividatnan di temblor, aunke ku esaki no nesesariamente ta ligá ku algu ekstraordinario. Den mesun rosea a indiká si ku tin di tene na kuenta ku Repúblika Dominikana ta situá riba un zona ku tin vários temblornan seguidamente.

Dia 23 di sèptèmber último, un temblor di magnitut 5.1 grado ku episentro di 12.9 kilometer di Villa Vasquez, a keda sintí na nort i nortost di e pais. Esaki a kousa daño na un hospital i dies skol den e zona.

Ekspertonan i e Instituto mes a atvertí ku e pais ta kore un gran rísiko di sufri un temblor di gran magnitut, meskos òf mas fuerte ainda ku 7 grado manera esun registrá na Haiti, na aña 2010.