E ta biaha pa Hulanda den luna di aprel Jhan Rifaela lo no picha pa Santa Maria den 2019

122
Jhan Rifaela a bisa Vigilante ku kualkier dia ku e regresá Kòrsou, niun tim no mester papia kuné mes, paso ta Santa Maria Pirates e ta bai.

Willemstad,– E hóben picher Jhan Rifaela kende sin duda ta un di nos mihó pichernan na Kòrsou den e último añanan tirando pa e ekipo Santa Maria Pirates, lo no picha pa e ekipo Pirata di Kòrsou den temporada 2019.

Informashonnan ku Vigilante a risibí ta indiká ku Jhan lo biaha pa Hulanda den luna di aprel pa aya hunga pa e ekipo di Amsterdam Pirates.

Unabes ku nos a risibí e informá aki, mesora nos a tuma kontakto ku e picher slengu, kende no a bisa pa akseptá ku di bèrdat e lo bai picha na Hulanda den 2019.

E promé reakshon di e picher Rifaela, tabata kon nos por a sa di e notisia aki, paso ta algu ku ainda ni dirigentenan di e ekipo Santa Maria Pirates no ta na altura. Nos úniko kontesta na Jhan tabata ku 99,9 porshentu di kosnan ku ta pasa den beisbòl lokal i na tur nivel, ta yega serka nos di un òf otro forma.

E picher a konta Vigilante ku el a keda kla ku su papelnan despues ku for di aña pasa òktober señor Joan Witte a papia kuné di e posibilidatnan.

El a splika Vigilante ku e mener Joan Witte aki a kana tur e kamindanan kuné kaminda nan kier a sa si el a nase di un mama hulandes i si tabata asina outomátikamente e ta haña e pasport hulandes i tambe nan kier a sa ta for di ki tempu su mama  a bira hulandes.

“MI a mustra nan tur esakinan i nan a kana komí te ku mi tin sita dia 25 di mart na Kranshi pa tuma mi pasaporte i despues di dos siman lo mi sali pa Hulanda”, asina Jhan a konta Vigilante.

El a splika nos ku e kosnan ta hasta regla i ku e lo kompartí kamber na Hulanda ku e hungadó di Sint Maarten Denzel Richardson.

Jhan a hunga sinku temporada ku e Piratanan di santa Maria i el a bisa Vigilante ku Santa Maria ta keda su tim i ku si e kaba trempan ku e kampionato di Hulanda, e lo bin picha pa su ekipo akinan. Tambe el a bisa nos ku kualkier dia ku e regresá Kòrsou, niun tim no mester papia kuné mes, paso ta Santa Maria Pirates e ta bai.

El a bisa nos ku e no tin niun problema ku Santa Maria, pero ku simplemente e ta bezig ta wak su futuro, kual ta algu ku tur hende lo a wak meskos.