Gassan Dannawi presidente di Democraat A yega ora pa polítiko di koalishon i oposishon sinta huntu

126
Willemstad,– Presidente di partido Democraat señor Gassan Dannawi a bisa Vigilante  ku e ta haña ku ta basta i ku a yega e ora pa tur polítikonan tantu di oposishon komo koalishon sinta huntu pa yega na ideanan komun pa atendé ku problemanan di pais Kòrsou.

Señor Gassan Dannawi ta splika ku a keda demostrá ku di e forma dividí ku nos ta, nos no ta yega niun kaminda i no por solushoná niun problema.

Señor Dannawi ta bisa ku pais Kòrsou no ta ser sirbi ku e sistema kaminda ku kada ken ta sirbi otro interes.

E loke ku ta pasando den Pais Kòrsou por ser konsiderá komo un falta di rèspèt pa e pueblo votadó, mirando ku ta deber di tur polítiko pa pone tur nanishi den mesun direkshon i sinta huntu atendé nos problemanan. Gassan ta bisa ku mester por pone tur kos un banda i traha pa Kòrsou. “E punto di salida mester ta Kòrsou promé”, asina señor Dannawi presidente di partido Democraat ta bisa.

E lider di e tolda kòra ta sigui bisa ku e solushon por bini solamente si nos traha huntu ku otro i no banda di otro i mas pió ainda sigur no kontra otro.