Ministerio di Enseñansa, Siensia, Kultura i Deporte ta trahando riba puntonan di prekupashon di SITEK

67
WILLEMSTAD – Riba djarason 30 di yanüari último, Konseho di Minister a reuní ku Direktiva di SITEK. A palabrá ku Minister enkargá ku e kartera di Enseñansa, sra. Marilyn Alcalá-Wallé ta sinta djarasón mes ku e servisio di skolnan Públiko (D.O.S.) pa haña un bista konkreto di e Plan di Limpiesa i ta komuniká esaki bèk ku SITEK asina e tin e informashon.

Tambe Minister Marilyn Alcalá-Wallé a haña e petishon di Konseho di Minister pa laga hasi un kalkulashon di e kostonan a base di e petishon di 30 di yanüari último di SITEK tokante e Plan di Limpiesa ku SITEK ta proponé.

Minister a sinta mesun djarason ku e Ministerio di Enseñansa, Siensia, Kultura i Deporte (ESKD) i nan ta trahando duru riba e petishonnan di SITEK. Riba djabièrne 1 di febrüari 2019, SITEK a akshoná na edifisio di Ministerio di Enseñansa, Siensia, Kultura i Deporte na Bon Biní Business Center, Schottegatweg Oost. Pa motibu di e inkietut bou di trahadornan okashoná pa e manifestantenan di SITEK, a tuma e desishon pa sera e servisio 12 or mèrdia.

Apesar di esaki, empleadonan públiko a mustra nan kompromiso ku komunidat i e trabounan a kontinuá riba djasabra 2 di febrüari 2019 pa dentro di poko Minister Alcalá-Wallé tin e informashon tantu pa Konseho di Minister komo pa e Direktiva di SITEK. Minister Marilyn Alcalá-Wallé ta gradisí empleadonan pa nan esfuersonan tambe den wikènt.

Pa lokual ta trata e petishon di e kaso dosente A bai B, esaki no a keda kla ahinda. E ta ketu bai den tratamentu den e aparato gubernamental.

Ministerio di ESKD ta trahando di forma diligente riba dje i asina Minister Marilyn Alcalá-Wallé tin e informashon basá riba e desishon di Konseho di Minister, ta komuniká esaki ku Direktiva di SITEK.

Pa lokual ta trata e otro puntonan di preokupashon ku Direktiva di SITEK a trese dilanti tokante e ‘Konbenio di Enseñansa’ (Onderwijsconvenant). Ministerio di ESKD ta trahando riba un skema di realisashon nobo. Asina e Ministerio tin esaki tambe kla, ta komuniká ku Direktiva di SITEK. Direktiva di SITEK a wòrdu poné na altura di esaki dor di Minister Marilyn Alcalá-Wallé.