Temblor di 6.5 grado ta sakudí México

38
Sitio unda e temblor a keda registrá.

CIUDAD DE MEXICO – Un temblor di 6.5 grado di magnitut a sakudí algun zona di México den oranan di ayera mainta. E episentro a keda registrá na 16 kilometer di e estado di Chiapas. Aunke ku vários personanan a evakuá edifisio i bibiendanan, outoridatnan a informá ku no a registrá dañonan na niun struktura, edifisio i tampoko tabatin personanan ku a resultá heridá.

E movementu aki a keda registrá na alrededor di 14 minüt pasá di 10. E informashonnan aki despues a logra keda sigurá pa e Servisio di Temblornan Nashonal di e pais.

E temblor aki tòg no a keda sintí pa hopi hende, kende nan sorprendé a puntra nan mes kiko tabata pasando na momentu ku nan tabata keda evakuá. Otro faktor ku a influensia esaki ta ku e alarma nashonal di temblor tampoko a zona.

Relashoná ku esaki e Sistema di Alerta di Temblornan mehikano, a informá ku no a aktivá e alerta na e kapital mehikano i ku a detektá ku ta trata aki di un movementu menor. Esaki a keda sintí na e Ciudad de México, Veracruz, Tabasco i Puebla.

Dia 19 di sèptèmber di aña 2017, un temblor basta poderoso di 7.1 grado a keda registrá na México. Esaki ariba e mesun dia ku a konmemorá un aña mas di e temblor trágiko ku a laga míles di morto na e pais na aña 1985.

E movementu na aña 2017 a laga basta daño atras na e estadonan sentral di e pais. Algun di a sifra e pèrdidanan na entre 4 mil i 8 mil mion di dòler.

E saldo tabata di mas ku 360 morto, mayoria di nan na e kapital di e pais i otro mas di 3.300 herido.