Eksitoso: SDKK a risibí 38 donashon i 41 ‘bestellingen’ pa tas. 16 tas i mueblenan tambe a wòrdu bendé.
Koral Specht –Sentro di Detenshon i Korekshon Kòrsou (SDKK) a risibí sosten masal di komunidat. Hopi bishitantenan di Passionistas Pop-Up Fair, ku a tuma lugá na Marshe Rondo, a kumpra tas i muebelnan ku e detenidonan a traha. Nan a entregá diferente material na SDKK i hopi hende a bestèl un tas.

Passionistas a organisá un kolekshon di material riba 3 di febrüari durante Passionistas Pop-Up Fair. Un grupo di detenidonan a kuminsá aña pasá ku un proyekto pa traha tas di diferente material. Passionistas a hasi un petishon na henter komunidat di Kòrsou pa rekoudá tela di jeans, otro telanan diki, hielu i zip pa asina e detenidonan por kontinuá e proyekto aki. SDKK a risibí 38 donashon i 41 ‘bestellingen’ pa tas. 16 tas i diferente meublanan tambe a wòrdu bendé.

What’s your story? tabata presente durante Passionistas Pop-Up Fair tambe. Un di e inisiadónan di e konsepto aki ta artista Sander Van Beusekom di BLEND Creative Imaging. E meta di What’s your story? ta pa stimulá kreatividat, uni komunidat i hasi Kòrsou mas nechi dor di arte. Sander van Beusekom a traha e pintura grandi “Ku Orguyo i Goso” den Marshe Nobo, kaminda e evento a tuma lugá. Spesial pa e muchanan e artista aki a traha ‘kleurplaten’ di e pintura. Aktualmente ta posibel pa kumpra e ‘kleurplaten’ i Sander ta invertí e fondonan generá den un ‘mobiele creatieve workshop’, ku What’s your story? ta bai usa den bario i na skol pa stimulá kreatividat.

Ademas e representantenan di Funditut a bende meublanan ku hóbennan a traha. Funditut ta siña hóbennan entre 18 i 25 aña diferente abilidatnan di traha kos di palu. E hobennan aki ku tin problemanan pa haña un trabou òf edukashon adekuá, tambe ta haña coaching ku ta yuda nan desaroyá kompetensianan den e área di trabou. Tabatin tres eksposishon di artista Yrzah Eisden, Hugo Sjak-Shie (doño di Paluarte) i Instituto Buena Bista (IBB). Apesar di esei, tabatin otro empresarionan i hòbiista ku a bai bende diferente produktonan artesano, obra di man, kuminda i kos di bebe.