Dos morto registrá den kandela di un hotèl na Buenos Aires

44
Outoridatnan ku a presentá na e sitio di e kandela aya na Buenos Aires.

BUENOS AIRES – Un muhé di 55 aña i un agente polisial a fayesé na Buenos Aires pa e kandela registrá den un hotèl na sentro di e siudat i ku ya a logra keda dominá. Esaki a laga ademas otro 48 persona hospitalisá, entre nan tres ku a sufri kemaduranan di gravedat.

E suseso a keda registrá den e Hotèl Las Naciones, ubiká na e avenida Corrientes, poko meter for di Obelisco, un di e zonanan di mas turismo di e kapital argentino.

Na e lugá tabatin presensia di bomberonan di e siudat i tambe Outoridatnan Federal di Argentina, kende nan a evakuá e establesimentu i múltiple agentenan polisial ku a enkargá nan mes ku seguridat i e zona.

Un di e agentenan polisial di e siudat di Buenos Aires, heridá di gravedat durante su intervenshon den e kandela, a fayesé algun ora despues den e Hospital Argerich, unda e otro nan ainda ta interná.

E agente aki tabatin 30 aña i tabata presta servisio na Komisaria komunal number 4 di e kapital.

E kandela aki aparentemente a inisiá na e di sinku piso. I segun por a apresiá riba imágennan kompartí pa medionan di komunikashon, tabatin kolumnanan di huma pretu saliendo for di bentanan di varios planta di e edifisio.