Grupo di kachó ta ataká i mata muhé na México

100
Parti di grabashon di kámaranan di seguridat di e área.

CIUDAD DE MEXICO – Den e munisipio mehikano di Tecámac, na e estado di México, un grupo di kachónan di kaya i sumamente brabu a sa di ataká i di e forma aki pone fin na bida di un muhé. Esaki riba kayanan di e pais, miéntras ku e muhé tabata dirigí su mes pa su lugá di trabou.

E víktima a keda identifiká komo Margarita ‘N’, di 34 aña di edat, kende a keda ataká pa e grupo di animalnan aki riba e anochi di dia 28 di yanüari último. Esaki su kurpa sin bida i ku heridanan rondó di su kurpa a keda hañá den oranan di e siguiente dia mainta.

Segun outoridatnan di e pais a indiká, inisialmente outoridatnan a sospechá ku tabata trata aki di un kaso di feminisio.

Sinembargo, despues kontrolá algun kámaranan di seguridat i e grabashonnan di esaki nan den e zona, outoridatnan a bin deskubrí ku e muhé a keda ataká pa un grupo di por lo ménos dies kachó di kaya ku tabata mustra sumamente brabu.

Fiskalia General di Hustisia di e Estado di México a ordená outoridatnan polisial di Tecámac pa kapturá e grupo di animalnan aki. Pero e echo ku bisiñanan di e zona ta duna esaki nan di kome, na un prinsipio a impedí ku outoridatnan por a bai ku e animalnan.

No opstante e grupo di bisiñanan aki a sa di komprondé i a stòp di resistí despues ku nan por a mira imágennan di grabashon di e echo i e atake feros ku a kita bida di e señora di un forma bastante kruel.