Hòmber buská pa eksploshon di bankomátiko arestá

Kámara a kapta imáhen di e sospechoso

1346
Willemstad—–Tabata e tim di aresto despues di a haña  e informashon na unda e sospechoso ku nan tabata buska pa eksploshon di dos bankomátiko den aria di Tera Kòrá ta skondí mesora a sali pa asina por a detené.

 

Ayera djaluna 4 di febrüari alrededor di 13.55’or, Tim di Aresto a detené e sospechoso Xiorendly Francisco Favier Jeandor, nase na Kòrsou di 27 aña di edat.

E sospechoso ku a Sali fo’i Banda Bou bin skonde pariba pero tòg a keda arestá.

E hòmber aki tabata wòrdu buska pa eksploshon, destrukshon, ladronisia i intento di ladronisia bou di sirkunstansianan pisá.

E detenshon a tuma lugá na un kas riba Cubaweg.

A presentá e sospechoso dilanti di un fiskal ouksiliar, ku a ordená su enkarselamentu pendiente di mas investigashon. Vigilante por a komprondé ku tabata fásil pa asina por a haña sa ken ta sigur unu di e sospechosonan. Esaki ta debí ku promé ku e eksploshon na e bankomátiko di Banko di Caribe kual tabata e último e sospechoso huntu ku otronan mester a stashoná nan vehíkulo den e besindario pa despues kana bai den direkshon di e bankomátiko pa asina por a kuminsá ku e trámitenan pa eksplotá esaki. Ora ku e eksploshon a  surgi ku sigur a sakudí kasi henter e bario di Tera Kòrá e sospechosonan tambe a kai den un tenshon formal i a kuminsá kuri bai den e direkshon di e vehíkulo ku nan a bin kuné. Tabata na e momento ei ku e sospechoso a kita e máskara for di su kara ku a pone ku e kámaranan di e negoshinan den e aria a kapta esaki fásilmente. Por a mira e imáhen di su kara kla kla ku a hasi e trabou di e tim investigativo mas fásil pa asina por a rekonosé e sospechoso. Ta buskando e demas sospechosonan ku ya nan nòmber ta konosí.

Loke ku sigur tin te ainda ku e sospechoso a forma parti di dje ta e intento di ladronisia for di e bankomátiko di Banko Caribe.