Kastigu di hòmber será pa asesinato interumpí

E tabata será pa asesinato di Kani den Barberia na Saliña

687
Willemstad—E detenido Claysendie Mercera su kastigu ku e la haña pa asesinato a ser interumpí i asina e por a bai kas promé ku su sentensia a terminá.

 

E detenido Claysendie Mercera alias Tula a ser detené komo un di e sospechosonan ku a forma parti den e kaso di asesinato ku a tuma lugá na aña 2011 den e barberia Ado Den Haag na Saliña. E dia ei e víktima  Kani a keda asesiná nèt na momento ku e la bai pela den kompania di su yu menor di edat. A drenta den e barberia unda a seft’é ku bala. Durante di huida asta a basha bala riba un outo di SKS ku nèt a kore yega Saliña. A surgi un persekushon ku a bin terminá den e bario di Koraalspecht unda asta a bai na kas di e sospechoso Mercera kaminda a bin konfiská paña i mas artíkulonan. E sospechoso mes no por a ser haña niun kaminda. Despues di tempu a bin haña sa ku Tula mester ta skondí na Hulanda i mesora a pidi su detenshon i ekstradishon bek pa Kòrsou. Aki e la wòrdu presentá dilanti wes na unda e la keda kondena pa un kastigu di prison di 21 aña. Durante ku e detenido tabata enkarselá su salu a kuminsá bai patras i a bin tuma nota ku e ta disponé di un malesa terminal. Na vários okashon a trat’é na Sehos i tabata siman pasa ku un biaha mas e mester a bai Hospital i gerensia di Prison despues di a deliberá ku Ministerio Públiko a yega na e desishon ku no por sigui kuida e detenido den Prison mas pa kual a interumpí su kastigu i a lag’é bai kas pa asina e buska yudansa pa su malesa. Vigilante por a komprondé ku e detenido tabata falta mas òf ménos 7 aña mas pa e kaba di kumpli ku su sentensia. No ta promé biaha ku ta interumpí kastigu di detenido i e último tabata e prezu ku a ser tira for di haltura den prizon ku a kai i fraktura su lomba.