Neymar: “Mi no ta sintimi felis”

123
Fot ney: Neymar dado momentu durante dje speach di su kumpleaño no tabata por kontené su emoshonnan ora e la papia di su leshon i krùk ku e mester kana riba pa un tempu largu

SAO PAOLO,  – Nan ta bisa ku plaka no semper ta duna felisidat i último konfeshon  di Neymar ta parse ta pas ku e teoria aki.

“Ta mi kumpleaño, pero awor aki mes mi no ta pasando den un momentu felis di mi bida”, asina e delantero di PSG a bisa visiblemente emoshoná.

E astro brasileño a selebrá  durante e anochi djaluna su di 27 aña aniversario.

Manera ta bini di ta habitual ta trata di un fiesta di mas luho ku tin, un mega fiesta den e Pavillion Gabriel den kamponan Elíseo, porsierto na unda a akudi  500 invitado.

E rekisito impresibel tabata di bisti na kòrá, es mas tabata un ‘Red Party’, patrosina pa Red Bull di kua ta e spònser personal dje  hungadó.

 

Neymar ya sa kua ta su futuro pa loke ta su leshon dje di sinku dede di pia reks “metatarsiano”, porsierto ku lo bai bira un tratamentu konservadó i lo ta 10 siman afó pa loke ta aktividat di futbòl.

Na Fransia tabatin un prekupashon pa estado aktual di Neymar. Segun informashon publiká algun dia atras di Le Parisien, e brasileño tin mesun dede di pia fraktura di kua e la operá aña pasá kaba.

E kaso tabata ku  e delantero di  PSG lo mester bolbe drenta kamber di operashon pa operá si òf no, miéntras huntu ku esaki mester bini e proseso pa rekuperá. 

Tur esaki a urgí un  bishita di e bondscoach di Brasil, Tite, na París pa analisá e situashon di Neymar i tambe su leshon. E  servisionan médiko di tantu selecáo i París Saint Germain a pone man na obra pa disidí kiko nan lo bai hasi ku e dolónan dje delantero brasileño.

Siman pasá tabatin un reunion dje spesialistanan di renombre mundial pa asina yega na un akuerdo i un informe kompletu pa loke ta e leshon dje delantero  ku a tuma lugá  23 di yanüari último  hungando e eliminatorio  dje Kopa di Fransia kontra di Strasburg.

Despues de vários interkambio di opinion na unda e dòkternan no ta kaba di ponenan di akuerdo pa loke ta e situashon ku e mester keda operá si òf no, alfinal a yega na un konsenso ku lo bai trata e leshon ku un tratamentu spesial konservadó pa evitá un operashon.

 

Konfeshon íntimo

Tabata trata di anochi largu di músika, alegria i festeho, pero ku tambe tabatin un espasio  e futbolista konta loke ta pasando kuné.

Tabata e momentu ku mas sentimentu  di hinter e anochi i di un forma inesperá ora ku Neymar a tuma e palabranan pa ekspresá su estado di animo.

“Ta hopi duru di kana ku krùk durante basta tempu. Mi ta sintimi hopi malu ku e situashon aki,  i tambe ta sinti un tristesa profundo.  Mi ke ta riba tereno di wega luchando ku mi kompañeronan di ekipo”, asina delantero paulista a bisa miéntras ku e tabata yora.

Pa lokual ta un kambio di ekipo den futuro serkano Neymar no a divulgá nada.

.