Posibilidat pa pone kontratista responsabel pa daño despues di 10 aña

Derechi i deber di un i tur Miéntras ku lei ta bisa ku bo mester hasi un keho denter di un tempu rasonabel, tòg tabatin..

166
Awe abogado Conquet a skibi un artíkulo sumamente interesante.
Willemstad——Te ainda nos ta bibando den un komunidat, kaminda tumamentu di trabou generalmente ta tuma lugá di forma informal, den sentido ku afspraknan no ta ser pone riba papel. Banda di esaki, ehekushon di e trabou mayoria bia no ta mara na niun klase di regla pasobra partidonan generalmente no tin hopi konosementu di e leinan i reglanan ku ta rigi e sistema di sera kontrakt.

Sinembargo e konosementu ski ta unu masha importante,  sigur pa esnan ku riba un base regular ta tuma trabou òf ta duna trabou na kontratistanan. Ora nos tende kontratista, mayoria bia nos ta pensa riba trabounan den kuadro di trahamentu di kas, manera trabou di mèsla i karpinté so. Pero trabounan duna na kontratista ta enserá muchu mas ku esakinan. Asina nos a topa ku un veredikto masha interesante di Korte di Kasashon, ku a trata trabounan di un kontratista pa ku instalashonnan di koriente na un krio di piska. Den e kaso spesífiko aki e kontratista a keda pone responsabel, pa daño pa ku trabounan hasí mas ku 10 aña pasa. A sosodé ku na aña 1998 e kontratista a remplasá tur waya i skakelar na e instalashonnan di e krio di piska. Sinembargo na 2010 ta bolbe surgi problema ku e instalashonnan, ku ta pone ku tur e piska nan ta muri. For di investigashon ta bin sali na kla ku e kontratista a usa material ménos resistente ku no tabata kumpli ku normanan stipulá. Apesar ku lei ta papia di un tempu rasonabel, tòg Korte a trata  e kaso despues ku mas ku 10 aña a transkurí. Durante e kaso e kontratista a trese entre otro pa dilanti ku e kontrapartido tabata lat ku su keho. E la bisa tambe ku su kondishonnan general ta liber’é di tur responsabilidat. Tambe e la purba di tira  falta riba su kontrapartido alegando ku e la faya ku kontròl. Sinembargo, ningun di e argumentonan aki por a yud’é i finalmente e la keda pone responsabel pa e daño na e krio di piska.

Hopi ta e loke nan ku finalmente nos por siña di e kaso aki. Un di e lèsnan ku sigur tur ku ta tuma trabou por saka afó ta pa stipulá por eskrito un tempu denter di kua esun ku ta duna trabou por hasi un keho. A yega tambe ora pa esnan ku ta hinka trabou den man di kontratista, bandoná e sistema di sera akuerdonan verbal i kuminsá sera akuerdonan por eskrito. Esakinan lo por evitá masha hopi doló di kabes.