Suspenshon di 3 wega pa Riechedly Bazoer

456
Riechedly Bazoer
HULANDA—E hóben mediokampista di e ekipo di FC Utrecht, Riechedly Bazoer, a risibí 3 wega di suspenshon. Esaki pa motibu di su komportashon despues di apénas e di dos wega huntu ku su ekipo nobo, FC Utrecht den Eredivisie di futbòl na Hulanda.

Tabata na final di e wega, unda nan a kai vensí 4-3 na man di PEC Zwolle, ku e mediokampista, a pusha e rèfri di mesa. Pa e komportashon aki, e la risibí un karchi kòrá, unda seguidamente tambe e la risibí suspenshon di 3 wega di su ekipo. Tur esaki despues ku durante di e wega mes, tambe e la risibí un karchi hel.

Pues despues di hunga 126 minüt na Hulanda, despues di wòrdu di hür for di VfL Wolfsburg na Alemania, lo e mester sinta afó, durante di e próksimo 270 minütnan di wega di su ekipo. Ta trata aki di weganan kontra respektivamente e ekiponan di PSV, ku nan lo topa na kas, De Graafschap, unda nan lo hunga komo bishitante i kontra Excelsior, ku tambe lo bira wega ku nan lo efektuá na kas.

Miéntras tantu su ekipo nobo, no tabatin un bon inisio di e segundo parti di temporada, unda a sufri derotanan di 3-0 na man di AZ, 1-0 kontra Willem II i awor 4-3 kontra PEC Zwolle. Esaki a pone ku e ekipo ku tabata na di 4 puesto, despues di 3 siman ta bai di 6 puesto i awor lo no por konta ku Bazoer pa 3 wega.