4 entidat ta uni forsa pa kombatí eksploshon riba bankomátikonan

85
Willemstad—–Manera komunidat por a tuma nota, for di aña pasá, Kòrsou ta wòrdu asotá pa un o mas grupo ku ta kometé destrukshon riba bankomátikonan pa medio di eksploshon, ku e fin pa por hòrta plaka efektivo for di e mashinnan aki.

 

E práktikanan aki, fuera di e echo ku nan ta forma un menasa i peliger serio pa esnan ku ta trafiká i/o biba den besindario di unda e eksploshonnan aki ta keda kousá, ta echonan kastigabel riba nan mes manera eksploshon, destrukshon i ladronisia bou di sirkunstansianan pisa, riba kua tin kastigunan di prison.

For di aña pasá, Kuerpo Polisial Kòrsou, RST, Ministerio Públiko i bankonan lokal ta trahando den estrecho koperashon ku otro pa asina minimalisá i te asta trata na eliminá e fenómeno aki.

Ya kaba e 4 entidatnan aki a tuma un kantidat di medida i lo bai sigui tuma mas medida pa ketu bai hasi e riesgo di e “atentadonan” aki mas chikí.

KPC, RST i Ministerio Públiko, mirando e seriedat di e asuntu aki, a instituí un tim di investigashon, ku ta trahando ku alma i kurpa, pa hasi detenshonnan i desartikulá e grupo(nan) ku ta hasiendo nan mes kulpabel na e aktonan aki.

Prueba di esei ta e 4 detenshonnan kaba ku tin den e kasonan aki.

E 4 entidatnan aki lo keda traha den koperashon ku otro i lo no spar ningun esfuerso pa frustra i/o hasi ladronisianan riba bankomátiko ménos atraktivo.

Naturalmente semper nos ta sigui konta ku yudansa di komunidat su disponibilidat pa suministrá e informashon ku por yuda na kondusí na solushon di e kasonan aki.