Argumentando ku el a kontesta e mesun preguntanan un biaha kaba Promé minister a dal mike riba mes lanta bai laga tur hende

193
Willemstad,– Promé minister Eugene Rhuggenaath a presentá na kantor di PWFC ayera riba petishon di trahadónan di isla pa asina e tende nan preokupashon. Den parti final di e reunion promé minister Eugene Rhuggenaath lo mester a dal e mike riba mesa i e lanta bai laga tur hende, poniendo tambe ku e reunion a tèrminá di e forma aki. Promé minister a bisa si ku e tabatin un reunion pa sink’or i tambe el a bisa di un forma poko indigná ku el a kontestá e pregunta tokante di Clift Christiaan un biaha kaba.

Promé minister a presentá tambe ku minister di GMN señora Suzy Camelia Romer i minister di Finansa señor Kenneth Gijsbertha huntu ku direktor interino di RdK señor Chonki de Lanooi.

E reunion tabata unu ku a dura bastante largu kaminda diferente trahadó a haña oportunidat pa hasi pregunta i duna nan splikashon, miéntras ku promé minister Eugene Rhuggenaath i señor Chonki de Lanooi tabata esnan ku tabata kontestá e trahadónan.

Dado momentu minister a anunsiá ku 5’or e mester bai pa un reunion den Forti, pero apesar di esaki 5’or a bati i minister tabata ketu bai na PWFC.

For di trempan trahadónan a trese dilanti ku nan no ta deseá señor Clift Christiaan den e tim i ku e mener aki mester bai for di e tim negoshadó, pero promé minister Rhuggenaath a kontesta ku si mester buska mas profeshonal pa hinka den e tim negoshadó, lo hasi esaki, pero tambe el a bisa ku si mester hasi uso di Clift Christiaan su sabiduria lo hasi esaki, pues promé minister niun momentu no a mustra dispuesto pa saka señor Christiaan for di e tim negoshadó.

Dado momentu promé ku final di e reunion, sindikato lo mester a bisa minister ku nan un mandato di trahadónan, kual ta pa saka señor Clift Christiaan for di e tim negoshadó i tabata akinan ku promé minister a disidí di bisa ku el a kontesta esei un biaha kaba i a benta e mike riba mesa i lanta bai laga tur hende inkluso minister Gijsbertha, minister Camelia Romer i Chonki de Lanooi. Naturalmente e trahadónan tabata bastante rabia ku e suseso aki i despues a disidí ku nan ta bai Punda den Forti kaminda ku promé minister ta.