Earl Balborda: Awe lo para e último planta

561
Willemstad,– Miéntras ku trahadónan ta sigui lucha pa sa futuro di refineria Isla, e bosero di refineria señor Earl Balborda ta splika ku pa awe lo para e último planta ku ta prosesá krudo. El a bisa ku si e barku Ikaro por keda liberá ta un di e solushonnan mas lihé ku por tin. E ta bisa mester buska un solushon riba tèrmino kòrtiku.

Di parti di refineria Isla nan a papia ku gobièrnu i gobièrnu a bisa ku nan ta tratando pa hasi algu pa ku e barku Ikaro. Balborda ta bisa ku tin urgensia. E ta bisa ku no sa di unda lo bini  ku krudo ainda. “E refineria ta bai para, tin un barku mara for di desèmber i no sa ki dia e barku ta bai bèk. No sa ki dia refineria lo ta bèk den operashon”, asina Balborda a duna di konosé.

El a bisa ku Refineria ta tene sindikato na altura di lokual e kosnan ta, si nan puntra awor aki, lo mester bisa nan ku Ikaro tin mas ku un luna para i no kier lòs e barku. “Pues e realidat awor aki ta ku no sa ki dia e refineria ta bèk den operashon”, asina e bosero a sigui bisa.

Señor Balborda ta splika ku e mandato ku refineria Isla tin di parti di PDVSA, ta pa kumpli ku e mandato i esei ta, manehá e refineria te dia 31 di desèmber e aña aki, pues ta p’esei mes a pone preshon biaha pasa pa pone CRU bèk den operashon i nos a tene nos na e palabrashon ku ta trese krudo, i nos a hasi esaki dia 20 di desèmber keriendo ku tur kos tabata ‘clear’ despues ku a bai korte, pero niun hende no a konta ku e faktor di ku pa malu ta tene un barku i ninga di baha e krudo pa e barku por bai, kousando asina opstákulo pa ku funshonamentu di e refineria”, asina Balborda a terminá bisando.