Ganashi lab di droga kasi 900.000 euro pa luna

113
20.000 liter di material kímiko
ZWOLLE—A deskubrí un laboratorio di droga grandi na Schuinesloot, serka di Hardenberg Overijssel.

A haña 20.000 liter di material kimiko. E reseta pa traha amphetamine tabata riba muraya. Ministerio Públiko a informa ku tabatin un volmen di benta di 840.000 euro pa luna den e laboratorio. E laboratorio tabatin algun luna den uso prome ku nan a deskubri esaki aña pasa. Djaluna e dos sospechosonan tabata den korte na Zwolle. OM a pidi 1,5 aña pa Willem A (1963), doño di e tereno kaminda a deskubrí e laboratorio den schuur. E hòmber ta ninga ku e tabata sa di e produkshon di droga riba su tereno. El a kere ku tabata usa e kimikonan BMK i APAA pa traha ferf. A haña diferente material pa produkshon di droga den e laboratorio. E doño di e tereno a keda detené den pasado pa kultivashon di mariwana, den mesun espasio kaminda despues a bin un laboratorio di droga. toon van den D (1973) di Brabant a keda detené e anochi di entrada hudisial. Esaki no a bai sin resistensia. E tabata presente den e laboratorio i a logra hui prome. Ora su amiga a pasa buske na un stashon di gasolin, polis a detené. Toon tambe ta konosí pa outoridatnan relashoná ku produkshon di droga. Na Bèlgika el a keda kondená relashoná ku trafikashon droga. Toon a ninga ku e tabata envolví den produkshon di droga den e laboratorio. Supuestamente e tabata na e sitio pa hasi limpiesa.  OM ta sospechá Toon den kaso di laboratorio di droga na Zeeland ku a keda desmantelá den novèmber 2017. Aki tambe e reseta pa produkshon di amfetamine tabata riba muraya i tabatin mesun aparatonan pa produkshon di speed. A haña dna di Toon den e laboratorio na Zeeland. OM a pidi 3 aña di kastigu pa Toon van den D. Un di tres sospechoso tambe di Brabant, mester presentá den korte denter di algun siman.