Kuenta di bai ku asiento ta payasada Juniel Carolina ta drenta parlamento pa frakshon di MFK

488
Juniel Carolina ta bisa ku esnan ku ta papia di baimentu ku asiento ta echt payaso.
Willemstad,– Tur kos ta kla pa awor si señor Juniel Carolina drenta parlamento pa asina forma parti di e frakshon di MFK.

Señor Carolina a bisa ku e apresiá su partido i su lider Gerrit Schotte pa e puesto ku el a haña. El a risibí un karta i el a akseptá kaba pa e drenta parlamento.  Direktiva di MFK niun momento so no tabata kontra pa Carolina bira parlamentario i tur hende tabata di akuerdo ku esaki. Juniel Carolina mes a bisa ku no tabatin nada di preshon ni nada negativo mirando ku direktiva for di promé instante tabata di akuerdo pa el bira parlamentario. “MFK ta un partido hepi organisá i kosnan no ta bai pa loko. Ta huntu ta traha pa defendé e pueblo di Kòrsou den tur sentido:”, asina e próksimo parlamentario a duna di konosé.

E ta bisa ku bo ta tende yen kos for di despues ku Gerrit a trese su deseo dilanti. “Bo ta haña hendenan ku ta trata di influensha bo, pero mi ta hopi madurá kaba i no ta fásil pa influensha mi den e tipo di kosnan aki. Nos ta bezig ku kos serio i mi ta lamentá ku tin hendenan ku a trata di influensha mi i trese kosnan dilanti sin base”. “E asuntu di ku mi t bai ku asiento ta echt payasada. Hendenan ta trese broyo sin ta na nodi, pero ora bo bai investigá, bo ta sa di kua huki nan ta bini, pero bo ta sigui traha, bo ta sigui dal bai ku bo trabounan pa pueblo”, asina Carolina a duna di konosé.

Próksimamente señor Juniel Carolina ta bai huramentá despues ku griffier kaba di atendé su papelnan pa asina e kompletá e frakshon di MFK bèk na sinku miembro.