Rapòrt den man di Hunta di Minister ta sali publiká

148
Punda—E proseso pa retirá e dos empleadonan na RdK, Kinburn i Cijntje, huntu ku direktor van Kwartel, tei bira un problema grandi. E retiro nan a tuma lugá abase di un rapòrt konsepto, miéntras ku e empleado nan mes nunka no a risibí unu definitivo de nan man.

Manera Vigilante a publiká, ya kaba e proseso di e retiro ta mancha i kontra di linanan di bon maneho, lokual tei kousa hopi problema den Hunta di Minister na Fòrti Amsterdam. Pa kolmo, miéntras e tres funshonario nan envolví, no tin e rapòrt den man, un fuente fo’i den seno di Hunta di Minister a saka e rapòrt afó, unda konsekuentemente e kontenido a wòrdu publiká. Te ku 3 di febrüari último e rapòrt en kestion tabata den man di e Hunta di Komisario i no tabatin konosementu di e kontenido. 3 di febrüari último hunta na RdK mester a entrega e rapòrt na ministernan den Fòrti i dos dia despues e kontenido a wòrdu publiká. E insidente aki a mancha e proseso di retiro di esnan envolví unda RdK i minister Rhuggenaath tin di atendé ku e grado di konfiansa den e seno di ministernan na Fòrti Amsterdam.

Ayera den un komunikado, Refineria di Kòrsou(RdK) a duna di konosé di ta lamentá ku kontenido di e rapòrt di e investigashon interno ku Hunta di Komisario a laga traha, i den kua a sali na kla ku tin indikashon konkreto ku tabatin iregularidat ku a tuma lugá ante un di e partidonan partisipante den e proseso di lisitashon (bidding) pa yega na un manehadó i operadó pa nos refineria, ta den medionan di komunikashon.  Maske RdK ta hiba un maneho transparente, tòg den e kaso spesífiko aki RdK a tene kuenta ku esnan envolví ainda ta kanando i agotando e medionan pa defendé nan derecho na un forma hustu. Talbes publikashon di e rapòrt ta sirbi un interes partikular, pero e ta hasi daño na interes general.

RdK ta lamentá ku ta hiba un diskushon públiko, relatá na e proseso importante aki sin tene kuenta ku ta trata di un proseso ku nos mester atendé ku prudensia i madures na bienestar di kontinuashon di refinashon unabes e kòntrakt aktual finalisá na fin di 2019.   E spekulashon p.e. rondó di nòmber di e ‘preferred bidder’ den medionan tampoko a kontribuí na krea un klima madurá, kaminda terser ta hañ’e responsabel pa hasi negoshi den dje. No ta pòrnada ta firma akuerdonan pa no divulgá detayenan públikamente durante di e negoshashon (NDA) entre partidonan.   Na vários okashon, segun RdK nan a enfatisá ku e proseso aki ta eksigí di kada un di nos pa karga nos responsabilidat i kolaborá den tur trankilidat pa huntu nos logra sigurá kontinuashon di nos refineria.