Segun señor Edward St. Jacobs di SEBI Diripiente gerensia di FKP no kier firma protokòl

138
Segun señor Edward St. Jacobs, a traha un protokòl i a hinka e puntonan aden kaminda SEBI i FKP mester a bai di akuerdo i firma esaki.
Willemstad,– Segun e vise presidente di SEBI señor Edward St. Jacobs, trahadónan di FKP ta bisa ku diferente rapòrt a ser traha i diferente análisis a ser hasi, pero nada no a bini afó.

Nan ta splika ku a traha grupo di sinku awor pa hasi análisis pa yega na kosnan konkreto.

Segun señor St. Jacobs, a traha un protokòl i a hinka e puntonan aden kaminda SEBI i FKP mester a bai di akuerdo i firma esaki. Finalmente gerensia di FKP a bai di akuerdo ku e protokòl i dia 5 di febrüari nan mester a firma esaki, pero e ta bisa ku pa su sorpresa, dia 4 anochi e direktor di FKP ta yama su persona pa inform’é ku e protokòl no ta bai wòrdu firma mas i ku mester kambia algu kos den dje,

E sindikalista ta bisa ku esaki a trese kuné ku a hiba e mensahe pa e trahadónan i esakinan nan na turno ta bai disidí kiko ta bai pasa.

Un punto importante ku señor St. Jacobs a trese dilanti ta ku no ta papiando di kitamentu di hende for di trabou, sino simplemente di baha gastu dor di sierto ehersisionan manera entre otro stòp di tuma hende na trabou i tambe pa baha gastu den mantenshon, tantu den FKP komo kontratistanan ku ta traha pa FKP.

Pa loke ta generamentu di entrada, e ta bisa ku tin diferente sèn riba kaya i mester drenta areglo di pago ku e hendenan ku debe FKP. “Ta e tipo di puntonan aki tin den e protokòl”, asina St. Jacobs a duna di konosé.

Mas aleu e representante di SEBI ta bisa ku tambe tin ku gerensia na promé instante a bai di akuerdo ku e protokòl te ku a yega na akuerdo pa firme.

“Loke ta pasa ta ku for di reunion ayera mainta a sali ku e kos aki ta inakseptabel. Paso si maneho di kompania ta bisa ku no ta firma un akuerdo asina pa mantené e kompania riba pia, ta nifiká ku bo no tin e kompania na pechu”, segun St. Jacobs.

Ayera mes SEBI a formulá un karta pa direktie pa splika nan kiko ta e posishon di sindikato pues  pa asina por sinta i pasa den e protokòl pa wak kiko ta nan doló i tòg ainda firma esaki.