Eksplosivo atrobe den klup nokturno Zoetermeer

119
agente di EOD huntu ku polis na Club Magnum
ZOETERMEER—Outoridatnan polisial a bolbe haña un eksplosivo den un klup nokturno na Zoetermeer.

Ayera nochi polis a haña melding ku tabatin un opheto sospechoso banda di e edifisio di Club Magnum i a hasi inspekshon di e opheto, ku a result di ta un eksplosivo. A desaktivá e eksplosivo. No a divulgá ainda ki tipo di eksplosivo. Ta hasiendo investigashon. Anteriormente e klup nokturno aki tabata blanku di kriminalnan. Na dèsember 2018 burgemeester Aptroot a laga sera e klup nokturno pa 6 luna pasobra a haña un handgranaat. Algun luna prome den sèptèmber, deskonosinan a pasa lòs tirunan riba e klup. E insidentenan na Club Magnum a kondusí na hopi intrankilidat serka bishitantenan i doñonan di establesimentunan di deporte den serkania segun Omroep West.