Haiti ta solisitá kurpa di personanan ku a pèrdè nan bida serka di Bahamas

92
Tipo di embarkashon den kua e personanan ta biaha.

PORT-AU-PRINCE – E minister di Asuntunan di Eksterior di Bahamas, Darren Henfield, a informá den oranan di ayera ku e embahada haitiano a solisitá na su persona pa entregá e kurpanan di e 29 haitianonan ku a fayesé den fin di siman tras di lomba. Esaki despues di noufragio di un barku na momentu ku nan tabata intentá drenta di forma ilegal den teritorio atlántiko.

Inisialmente a reportá ku un total di 28 persona a hoga serka di e parti nort di Abaco, pero Forsa Real di Defensa di Bahamas a oumentá esaki despues, aktualisando e na 29 persona despues di a haña un kurpa sin bida mas.

Igualmente, un total di 18 persona a sa di sobrebibí e suseso, kua a keda registrá djasabra tras di lomba.

Outoridatnan di Bahamas a indiká ku te ainda ta deskonosé e kantidat di personanan ku tabata abordo, aunke ku ta kalkulá ku esaki ta kasi 90.

Na luna di novèmber di aña 2013, 30 inmigrante haitiano a pèrdè nan bida den awanan di e distrito di Exuma, formá pa vários islanan, na momentu ku e embarkashon den kua nan tabata biaha a noufragá.

E sobrebibientenan di e suseso di e fin di siman tras di lomba a keda reskatá entre djasabra i djadumingu na seis mia di e sitio unda e embarkashon supuestamente tabata, posteriormente nan a keda interná den un sentro médiko pa asina por keda evaluá medikamente. Esaki nan seguidamente lo keda entregá na outoridatnan di inmigrashon.

Despues di un ratu di búskeda, vários personal polisial i entrená a haña e embarkashon den fondo di awa i e kurpanan sin bida.

Di su banda, papa Francisco a lamentá den oranan di ayera, relashoná ku e 29 haitianonan ku a pèrdè nan bida.

Den mesun rosea e embahada estadounidense na Haiti, a pidi tambe pa e haitiano no riska nan bida realisando e tipo di biahenan aki.

Ta trata aki di e di seis barku di haitiano ku a keda interseptá pa outoridatnan for di inisio di aña.