Kaya na di Kòrsou tabata na kandela ayera

286
Punda—Ayera fo’i den oranan di mardugá, Kòrsou a kuminsá sinti efektonan di akshon sindikalista. Prinsipalmente tráfiko na Kòrsou a sinti e efektonan mas tantu, despues ku wèlguista nan a sera dos kaminda prinsipal ku kran i kima vários tayer na diferente sitio, unda tráfiko mester pasa.

Tabata ayera den ora nan lat di mardugá ku sentral a risibí notifikashon di dos kran  blòkiando tráfiko. Unu na altura di Nieuwe Haven n’e krusada pa bai Asiento miéntras unu mas algun meter for di e edifisio di Ennia, Altagracia Delanoy Blvd.  Mesora a sera tráfiko na ambos sitio mientras a kuminsa traha riba e bloke riba Nieuwe Haven promé. Mester apuntá ku ayera polis i servisio di bombero a hasi un trabou sublime pa skapa komunidat di inkumbinensia okashona pa e blokeo i kandela nan.  Manera menshoná a start trabou mesora na Nieuwe Haven unda kuater funshonario di polis a inisiá e proseso pa start e kran i move esaki. Manera menshoná, e tráfiko direkshon di Biesheuvel pa Nieuwe Haven a wòrdu será pa duna e funshonarionan di polis e chèns di traha trankil. No a dura muchu largu, ku nan a logra start e kran blanku grandi ku tabata blòkia Nieuwe Haven pa un banda kompletu. No ta konosí, kon esaki a logra start, pero al final,  promé ku solo por a sali i yama Kòrsou bon dia, e kran tabata stashoná banda di kaminda.

Seguidamente e kran di polis stashoná na Nieuwe Haven a sali duru bai direkshon brùg Juliana via di Nieuwe Haven mes. Na brùg Juliana, polis a logra desviá e trafiko biniendo fo’i direkshon Seri Domi pa Altagracia Delanoy Blvd ku tabata blòkia ku un di dos kran. E tráfiko a wòrdu desviá pa pasa via di Punda. E kran di polis a sigui derecho pa Seri Domi unda a pasa piki dos vehíkulo bieu stashoná na un manera sospechoso kant’i kaminda. Despues di a konfiská e dos vehíkulonan, e polisnan a sigui pa bai atendé ku e di dos kran na altura dui Ennia. Un biaha mas, bon aktuashon di polis a logra kita e kran kolo hel den apénas algun minüt pa aliviá e tráfiko pa Parera.

No a tuma muchu tempu ku ya kandela a start. Apénas algun minüt despues ku polis a kita e kran na Ennia, sendementu di tayer riba kaminda a kuminsá na altura di e sede sindikal PWFC. Einan mesora polis a logra hasi un aresto. Servisio di bombero a yega i logra paga e kandela. Despues a sigui diferente kimamentu di tayer riba kaminda. Na altura di Nieuwe Haven na krusada pa bai DOK a sende tayer na kandela i 200 meter mas leu na krusada di Asiento tambe. Einan un biaha mas bombero nan a yega na tempu pa paga kandela. Entretantu a sende tambe algun mondi i sushi na kandela. E último kandela  a tuma lugá na subida di brùg direkshon Seri Domi pa Punda. Einan a kousa daño konsiderabel na e asfalt riba brug.