PIN ta keda ku enfoke riba tene Refineria habrí

143
Corriweg — Partido Inovashon Nashonal (PIN) ta konsiente di e hansha ku hopi trahadó na Refineria Isla i nan famia ta sinti awor ku e negoshashon ku e kompania preferí den e proseso di destaho públiko pa haña un operador a stanka. E hansha aki ta kompartí dor di hopi yu di tera ku tambe, komo trahadónan serka kontratistanan ku ta traha pa Refineria Isla, ta bou di e tenshon grandi aki.

 

Komo partido ko-responsabel pa guia nos pais, nos ke enfatisá lo siguiente: PIN ta para duru pa e eskoho ku nos pais a hasi unánimamente pa tene refineria habrí. Nos ta keda enfoká riba buska un operador pa nos refineria. Awor aki, komo e siguiente paso pa yega na un operador,  Gobièrnu ta sigi na mesa ku e otro kompanianan riba e asina  yamá ‘short list’, esta lista ku diferente kompanianan ku a hasi proposishon pa bira operaror.  PIN ta enfoká ademas riba sostené Refineria Isla (PDVSA na Kòrsou) pa logra un solushon i pa riba termino kòrtiku, buska un solushon pa kita  e embargo riba e tankero ku krudo pa nos refineria por risibí esaki riba terminó kòrtiku pa kontinuá operashon di e refineria. Den esaki PIN ta kontribuí na sigui e pasonan di Gobièrnu pa sostené Refineria Isla ku tur proseso ku ta nesesario- húridikamente- pa por kita e embargo pa e krudo bin liber pa rafiná.

PIN ta konsiente ku banda di e reto pa buska un operador pa e refineria i un solushon pa kita e embargo poné riba krudo di Refineria Isla, e doño di e refineria ta konfrontá problemanan di magnitut enorme. Interesnan internashonal di industria di petroli ta hunga un ròl. Riba tur esaki, nos ta tuma nota di e situashon di krísis humanitario, ekonómiko i di demokrasia interno na nos bisiña Venezuela. Ya paisnan grandi manera Merka, Europa a imponé sanshonnan i China i Rusia a tuma posishon. Esakinan ta forsanan ku Kòrsou no tin influensia riba dje, pero ku ta afektá nos ekonomia negativamente di forma impaktante.  PIN lo aportá na desaroyo di maneho di Gobièrnu ku análisis basá riba sano huisio pa loke ta trata interesnan di Kòrsou i kon pa sirbi esakinan tantu riba término kòrtiku ku pa largo plaso. Na e momentu aki mester mara fuertemente huntu pa logra un operador mas pronto posibel pa e refineria di Kòrsou.

PIN ta sirbí Kòrsou i tur su siudadanonan na promé lugá!