Venezuela ta denunsiá hayasgo di armanan ku a bini di Estádos Unídos

72
Armamentunan ku aparentemente a drenta pais den fin di siman tras di lomba.

CARACAS – E Ministerio di Interior di Venezuela a informá via di su kuenta di Twitter ku a haña armamentu prosedente di Miami, Estádos Unídos, na e aeropuerto internashonal Arturo Michelena, ubiká na e siudat venezolano di Valencia.

Segun a keda informá pa e vise minister di Prevenshon i Seguridat Siudadano, Endes Palencia, outoridatnan a haña munishonnan di kaliber fuerte, 19 fusil, 118 kargadó di fusil, 90 antena di radio i 6 telefòn selular.

E armamentu a keda hañá na e aeropuerto i segun reporte nan, esaki a drenta den oranan di djadumingu último na e pais, via di un Airbus N88IYV.

Den mesun rosea e vise minister a anunsiá ku e prosedimentu a keda poné na òrdu di fiskalia pa asina kontinuá ku e investigashonnan i yega na esnan responsabel di finansiá e gruponan teroristanan ku ta pretendé di atentá kontra pas di e pueblo di Venezuela.

Finalmente, outoridatnan a informá ku gobièrnu nashonal a reforsá e trabounan di seguridat na puertonan, terminalnan aéreo, zonanan di duna i otro espasionan di e pais pa asina garantisá e independensia, soberania i libertat.