Duo ku a atraká dos dama kita tas dilanti wes komisario

190
Willemstad— Ayera e dos hòmbernan ku a atraká dos dama den un kura di kas na Daniel kual despues a keda detené a wòrdu presentá dilanti wes komisario pa asina por a evaluá nan detenshon.

Tabata djárason 6 di febrüari 2019 alrededor di 10.57 or, Sentral di Polis a risibí notifikashon di un kaso di atrako ku a tuma lugá na un kas den área di Daniel.Dos dama ku tabata riba tereno di un kas a wòrdu atraká dor di dos hòmber sospechoso ku a ranka nan tas for di nan, drenta un vehíkulo i bai for di e sitio. E víktimanan a persiguí e sospechosonan i den Kaya Bloustenchi e sospechosonan a baha bai laga e vehíkulo atras.

Un unidat polisial ku tabata den e área a yega Kaya Bloustenchi i despues di un investigashon alrededor di 12 or di mèrdia a detené un di sospechosonan e hòmber A.E. nasé na Kòrsou di 21 aña di edat.

Kontinuando ku e investigashon alrededor di 16.05 or polis a detené na Warda di Reshèrshi e otro sospechoso, e hòmber J.A.S. nasé na Kòrsou di 23 aña di edat.

A presentá ámbos sospechoso dilanti di un Fiskal Ouksiliar, ku a ordená nan enkarselamentu pendiente di mas investigashon. Ayera e duo aki a keda presentá dilanti wes komisario pa asina por a evaluá nan detenshon na unda a alarga nan aresto pa asina por kontinuá ku e investigashon.