Despues di un fuerte lucha hibá pa e sindikatonan PWFC i APRI, finalmente gobièrnu a pone señor Clift Cristiaan un banda.
Willemstad,– Finalmente despues di un siman di akshon i preshon di parti di sindikatonan PWFC i APRI kendenan ta representá trahadónan di isla i staf di Isla, Gobièrnu di Kòrsou a tuma e desishon ku ta laga Clift Cristiaan kai numa i ta sake for di e komishon negoshadó ku ta trahando pa yega na un operadó nobo pa refineria Isla. E otro punto tambe gobièrnu a a sede i ta hinka Errol Cova den e tim negoshadó for di inisio ku kuminsá negoshá ku un posibel operadó nobo pa Refineria. Pues Sindikatonan a gana e lucha i awor tur trahadó lo ta bèk na trabou.

Sindikatonan a hasi dos petishon na gobièrnu i a bisa ku nan akshon lo no stòp te na momentu ku nan haña un kontesta ku nan lo por biba kuné. Den oranan di dia ayera gobièrnu a reuní den konseho di minister i finalmente a baha kabes opa e sindikatonan i akseptá ku nan ta saka señor Clift Cristiaan for di e tim. Esaki a nifiká tambe mesora ku e wèlga di e sindikatonan a yega na su final, mirando ku nan a logra nan propósito.

Ku esaki por konkluí mesora ku e pruebanan ku e sindikatonan tabatin, tabata bálido i ku nan a logra konvensé minister Suzy Romer pa e di su banda a konvensé e sobra ministernan ku e pruebanan ta palpabel. Pues e konseho di minister a manda e mandato pa señor Chonki de Lanooi ku señor Clift Crisiaan lo no por partisipá mas den e tim ku ta sigui negoshá ku e posibel kandidatonan pa operá e refineria i ta inkluí señor Errol Cova ku partisipashon total den e tim negoshadó.