Minister Kenneth Gijsbertha di Kòrsou huntu ku minister di fiansa di Aruba i esun di Sint Maarten durante tripartit na Aruba.
Willemstad,– Den kuadro di fortifiká koperashon entre e pais nan Aruba, St. Maarten i Kòrsou e Ministernan di Finansas di e respektivo pais nan a akordá pa koperá mas ekstenso riba área di finansa ku interes komun. Riba invitashon di nan respektivo Minister Presidènt e Minister nan di Finansa a reuní durante e Tripartit ku a tuma lugá resientemente  na Aruba.

Algun tema ku nan a diskutí ta inkluí reforma fiskal, maneho finansiero i posibilidat pa interkambio di personal ku ekspertisio spesífiko.

Na final a konkluí ku e pais nan tin hopi reto komun den e área di finansa i dor di interkambiá konosementu i eksperiensha lo por duna balor agregá na progreso di kada pais. E reunion tabata hopi eksitoso i a resultá den un kompromiso pa organisá tripartit entre e minister nan di finansa kada 6 luna. Minister Gijsbertha a tuma e inisiativa i presentá un konsepto di un akuerdo pa koperashon, kual vershon final lo keda ratifiká durante e siguiente reunion ku ta planifiká pa yüni 2019. Minister Gijsbertha ta gradisí e delegashon di Aruba pa a organisá un tremendo tripartite i tambe pa nan hospitalidat.