E lider di sindikato APRI ta bisa ku tin pruebanan riba papel, pero gran parti di e kehonan di sindikatonan ta kosnan ku nan a bin ta biba e último dianan i ministernan a bisa ku nan a komprondé angustia i e preokupashonnan.
Willemstad,– Señor Gherrel Remilia presidente di sindikato APRI ta bisa ku nan a kumpli ku e petishon i a hiba pruebanan pa e ministernan i a bisa nan bon kla ku mester papia riba hopi detaye. E lider di sindikato APRI ta bisa ku tin pruebanan riba papel, pero gran parti di e kehonan di sindikatonan ta kosnan ku nan a bin ta biba e último dianan i ministernan a bisa ku nan a komprondé  angustia i e preokupashonnan. Finalmente Remilia a bisa ku nan a logra, paso a kore ku Clift Cristiaan for di e komishon, kual tabata un eksigensia di e sindikatonan i nan miembronan.

Segun señor Remilia, e direktor interino di RdK, señor Chonki de Lanooi tambe tabata na mesa, pero el a bai poko trempan paso e tabatin reunion ku hunta di komisario.

Sindikato ta bisa ku nan a haña mandato pa warda te ku ayera mèrdia 12,or kaminda den kareda di 2’or e notisia a drenta ku ta saka Clift Cristiaan for di e tim negoshadó i ku pues esaki por keda konsiderá komo un triunfo pa e Sindikatonan i nan miembronan.

Señor Remilia ta bisa ku e motibu ku a disidí di bai kas di e ministernan antayera  tabata paso despues ku a haña kontesta serka promé minister, a bin tuma nota ku ta firma di promé minister so tabatin riba e karta. Durante di e reunion ku e dos ministernan, nan a bin splika Sindikato ku  ta esei ta e sistema, pues promé minister so ta firma un desishon di ministerraad. Pues e minister nan tabata na altura di e karta.