Boolchand’s unda aña pasa a logra di drenta kue basta merkansia bai kuné.
Willemstad—Despues di un kiebro dia 26 di desèmber 2018 na Boolchand’s Zeelandia kaminda mas o ménos 750.000 florin na merkansia a wòrdu hòrtá, a kuminsá un investigashon.

A detené 13 sospechoso kaba relashoná ku e investigashon aki i tur a keda presentá dilanti wes komisario. T sospechá ku e personanan aki a kumpra òf bende un of mas di e telefòn nan ku a wòrdu hortá na Boolchand’s. Ta trata aki di telefonnan karu manera e modèlnan mas nobo di iPhone i Samsung. E ladronnan mes te ainda no a wòrdu lokalisá.

Tantu Ministerio Públiko komo Polis ta di opinion ku ta importante pa atendé ku e kumpradó i bendedó nan tambe. Si no tin kumpradó, tampoko tin hòrtadó. Hecho ku por bende e artíkulonan luho aki riba kaya,ta hasi lukrativo pa kometé e tipo di kiebro nan aki. Indirektamente, e bendedónan tambe ta hasi nan mes kómplise na e kiebro. Formalmente nan lo keda pèrsigui pa kompra i benta di artíkulo hòrtá. E kastigu pa esaki ta varia di un kastigu di trabou ku un par di luna kastigu di prizon. Esaki ta un atvertensia pa tur hende ku kumpra un telefon riba kaya.

No kumpra telefon nobo riba kaya, pero semper den un negoshi ku bo por haña un resibu i garantia. Tene kuidou ora kumpra telefon segunda mano via medionan sosial. Komo kumpradó bo tin e obligashon di chèck ku ta kos hòrtá bo ta kumpra. Hasi preguntanan kritiko na e bendedó. Pidi un resibu i perkurá ku bo por lokalisá e bendedó si akaso tin kualkier problema. Check delantá kiko ta un preis realístiko (prijs di merkado) pa e produkto; no kai den tentashon pa kumpra produktonan demasiado barata. Si ta demasiado bon pa ta bèrdat, probablemente no ta bèrdat. No kumpra. Kòrda semper: sin kumpradó no tin hòrtadó.

No stimulá ladronisia! Mientrastantu, investigashon di e kumpradó i hòrtadónan ta sigui.