Agrupashon Musikal “Add9” ku tremendo Roadfire riba merkado

122
Nan a kaba di pone un Roadfire nobo riba merkado.
WILLEMSTAD,—- Na Boneiru agrupashon musikal Add9 di Boneiru a manda un tremendo Roadfire kaya. E titulo ta “Ta Karnaval mi ta bai” Ta un komposishon di e kantante Dayron Coffie i areglá pa Guido Mercera i Marvelous Molina.

Di informashon  ku a drenta na mesa di redakshon  di ‘E Mulina’, ta bisa ku e agrupashon musikal di Boneiru “Add9” ta bai partisipá den festival di Tumba na Boneiru ku 3 tumba di hende grandi i tambe nan ta partisipá den festival di Tumba Hubenil  ku dos kantante 2 di mucha.

Nos fuente a bisa nos ku e tumbanan ta zonando hopi bon, i ku solamente e parti di Brass mester ensayá kuné ainda.  Agrupashon musikal “Add9” ta hopi positivo i sigur ta di focus pa bai ku tur dos korona tantu di mucha komo di hende grandi. Tambe nos tin ku bisa ku nan Roadfire “ta Karnaval mi ta bai” ta zona duru tantu na Kòrsou i mas ku klaro na Boneiru na diferente radio emisora.

‘E Mulina’, ta deseá e formashon musikal “Add9” tur klase di éksito otro siman djasabra. Ta manera e hóben nan ta bisa den kaya ‘Ban pa bai’. Tambe nos ta deseá tur e otro banda nan na Boneiru tur klase di éksito pa ku temporada di Karnaval 2019.